Жан-Поль Макнамара скончыў БДУІР пяць гадоў таму. Ён жыве ў найбуйнейшым горадзе Паўднёва-Афрыканскай Рэспублікі Ёханэсбургу і працуе як мідл-распрацоўшчык у невялікай мясцовай кампаніі па кібербяспецы. devby папрасіў Жан-Поля распавесці, як малады чалавек з далёкай ПАР трапіў у Мінск, чым яму запомнілася Беларусь і што цяпер адбываецца ў паўднёваафрыканскай ІТ-сферы.
Жан-Поль Макнамара скончыў БДУІР пяць гадоў таму. Ён жыве ў найбуйнейшым горадзе Паўднёва-Афрыканскай Рэспублікі Ёханэсбургу і працуе як мідл-распрацоўшчык у невялікай мясцовай кампаніі па кібербяспецы. devby папрасіў Жан-Поля распавесці, як малады чалавек з далёкай ПАР трапіў у Мінск, чым яму запомнілася Беларусь і што цяпер адбываецца ў паўднёваафрыканскай ІТ-сферы.
— Я з невялікага гарадка ў правінцыі Фры-Стэйт. У Гаўтэнг [самую эканамічна развітую правінцыю ПАР з цэнтрам у Ёханэсбургу] я пераехаў ужо пасля вучобы ў Беларусі, у пошуках працы ў ІТ. Па паходжанні я ірландзец у чацвёртым пакаленні: дзядуля майго бацькі прыехаў у Паўднёвую Афрыку з Еўропы і пасяліўся тут у XIX стагоддзі.
Яшчэ да паступлення ва ўніверсітэт, з 18 гадоў, я пачаў працаваць фэшн-мадэллю на подыуме. Дарэчы, і ў Беларусі я ўдзельнічаў у шматлікіх фотасесіях, бо пачынаючым беларускім фатографам былі патрэбны мадэлі для стварэння партфоліа. У перыяд пошуку працы ў ІТ, калі я вярнуўся з Мінска, я працаваў мадэллю для найбуйнейшага афрыканскага люксавага брэнда Maxhosa Africa.
На вучобу ў Беларусь я трапіў па дзяржаўнай стыпендыяльнай праграме. Нашы краіны падтрымліваюць дыпламатычныя адносіны яшчэ з 1993 года, у ПАР Беларусь лічыцца перспектыўнай еўрапейскай краінай з развітымі тэхналогіямі. Таму мяне, як добрага вучня, накіравалі туды вучыцца ў найлепшую ІТ-ВНУ.
Беларусь мяне вельмі зацікавіла, бо гэта была мая першая паездка ў еўрапейскую краіну. Мне спадабалася незвычайнае спалучэнне архітэктуры ў Мінску, дзе сучасныя, новыя будынкі суседнічаюць са старажытнымі.
У ПАР 12 афіцыйных моваў, і я размаўляю на пяці з іх. Мая родная мова — англійская, яшчэ я ведаю афрыкаанс, а таксама мовы зулу, сесота і коса. Дарэчы, асноўныя працоўныя мовы ў нашым ІТ — гэта англійская і афрыкаанс.
У БДУІР я вучыўся ў асноўным на англійскай мове. Тым не менш, усе пяць гадоў, што я пражыў у Беларусі, я наведваў урокі рускай мовы. Гэта вельмі складаная мова для вывучэння.
У Мінску ў мяне быў беларускі сябар, які дапамагаў знайсці ў горадзе ўсё, што трэба. Я пазнаёміўся з ім праз свайго афрыканскага прыяцеля, і ён мне сапраўды вельмі дапамог. Але ў асноўным я камунікаваў з афрыканскімі студэнтамі, галоўным чынам з паўднёваафрыканцамі і нігерыйцамі. Таксама ў маім коле зносін былі паўднёваафрыканцы з сельскагаспадарчага ўніверсітэта [БДАТУ].
Пасля вяртання ў ПАР я падтрымліваю сувязь з многімі сябрамі, якіх сустрэў у Мінску — у тым ліку з Афганістана, Узбекістана і Нігерыі.
З нейкімі праявамі ксенафобіі ў Беларусі мне сутыкацца не даводзілася. Беларусы — вельмі цярплівыя людзі. Гэта асабліва добра відаць, калі вы спрабуеце размаўляць з імі па-руску, у вас дрэнна атрымліваецца, але яны вельмі стараюцца зразумець, што ж вы сказалі, і спрабуюць дапамагчы.
Самым яркім успамінам пра маё жыццё ў Мінску засталіся, бадай, доўгія зімы і снег, які ляжаў на вуліцах па шэсць месяцаў у год. Для мяне гэта быў унікальны вопыт.
Яшчэ мне запомніўся высокі патрыятычны дух беларускага народа. Насамрэч цяпер мне нават не хапае магчымасці часам пагаварыць на вашай мове. Гэта такая цудоўная мова! Мне так спадабалася вывучаць яе і размаўляць на ёй, што я дасюль у сябе, у Паўднёвай Афрыцы, слухаю рускі рэп.
Адукацыя, якую я атрымаў у Мінску, каціруецца ў нас вышэй, чым звычайныя паўднёваафрыканскія дыпломы. Паводле нашых стандартаў гэта Honours degree, ступень, якая знаходзіцца вышэй бакалаўрыята, паміж ім і магістратурай.
Калі б маладыя людзі з ПАР спыталі мяне, ці варта паступаць у БДУІР — я б, вядома, рэкамендаваў гэтае месца. Матэматыку там выкладаюць на вельмі высокім узроўні, мае веды і разуменне гэтага прадмета вельмі моцна палепшыліся.
ІТ у ПАР — гэта галіна, якая хутка развіваецца і квітнее. Праграмісты, спецыялісты ў галінах воблачных тэхналогій і ШІ патрэбны многім кампаніям. На старце заробак ІТ-спецыяліста ў ПАР складае каля $1200. Але гэта, вядома, залежыць ад памеру кампаніі і ад накірунку, у якім яна працуе.
Релоцировались? Теперь вы можете комментировать без верификации аккаунта.