Парада беспрацоўным: аб'ядноўвайцеся — і вам будзе прасцей знайсці працу

Эмі працавала дата-сайентыстам з лютага 2022 года, але ў маі 2023-га яе выклікалі на сустрэчу з HR і паведамілі аб звальненні. «Я не змагла стрымаць слёз», — узгадвае яна. На той момант жанчына была на пятым месяцы цяжарнасці і вырашыла сканцэнтравацца на здароўі і падрыхтоўцы да родаў.

У лістападзе, праз месяц пасля нараджэння дачкі, Эмі пачала актыўна шукаць працу. Тады яна даведалася пра кнігу Never Search Alone Філа Тэры, дзе апісвалася канцэпцыя «савета па пошуку працы» — невялікіх груп, якія аб’ядноўваюць беспрацоўных для ўзаемнай падтрымкі. Па рэкамендацыі з кнігі Эмі далучылася да такой анлайн-групы праз Slack.

Кожны тыдзень удзельнікі дзяліліся досведам: распавядалі пра сумоўі, дзяліліся парадамі па рэзюмэ і рабілі практыкаванні з кнігі. «Без гэтай групы я б не вытрымала такой колькасці інтэрв’ю», — прызнаецца Эмі. Па яе словах, парады калег дапамагалі спраўляцца нават з эмацыйнымі цяжкасцямі: напрыклад, падчас сумоўяў яна стала трымаць пад камерай фатаграфію дачкі, каб адчуваць спакой.

У красавіку 2024 года яе намаганні завершыліся поспехам — Эмі атрымала некалькі прапаноў і выбрала пасаду старэйшага інжынера ў буйной карпарацыі з Fortune 100. Рашэнне прыняць менавіта гэтую прапанову ёй таксама дапамагла прыняць група, абмяркоўваючы плюсы і мінусы варыянтаў.

Сёння Эмі ўпэўнена, што падтрымка супольнасці аказалася ключавой. «Незнаёмцы даюць больш аб’ектыўную зваротную сувязь, чым сям’я ці сябры, і дапамагаюць убачыць тое, што ты сам упускаеш», — кажа яна. На яе думку, перажываць звальненне ў адзіноце не варта: сумесны досвед дае сілы рухацца далей.