Аддзел навін world 9 мая 2025, 11:20

Стала вядома, колькі нельга будзе працаваць у Microsoft пасля звальнення

Microsoft становіцца ўсё больш бязлітаснай у дачыненні да супрацоўнікаў. Гэта праяўляецца ў двух момантах.

Па-першае, тых, каго звальняюць з-за нізкай прадуктыўнасці, уносяць у «чорныя спісы» — яны не змогуць уладкавацца назад у кампанію цягам двух гадоў. Пра такі тэрмін напісаў Business Insider, які азнаёміўся з унутраным карпаратыўным дакументам Microsoft. Па-другое, цяпер такія звальненні ў Microsoft называюць «good attrition». То бок яна радая, што пазбавілася ад такіх супрацоўнікаў.

Гэта новыя інструменты для Microsoft. Яны адлюстроўваюць трансфармацыю падыходу кампаніі да кіравання эфектыўнасцю супрацоўнікаў, якая складаецца ў тым, каб хутчэй пазбаўляцца ад лоўпэрформераў і трымаць іх як мага далей.

Мэтавых паказчыкаў па такім кадравым «адтоку», прынамсі, у дакуменце BI не выяўлена. Але, паводле слоў двух менеджараў, такая мера ўжо абмяркоўваецца на ўзроўні топ-кіраўніцтва і, верагодна, будзе замацоўвацца — на фоне росту чаканняў кампаніі ад супрацоўнікаў у плане выніковасці.

Аналагічная метрыка пад назвай «unregretted attrition» існуе і ў Amazon — яна літаральна пра адток кадраў, пра які кампанія не шкадуе. У падраздзяленняў ёсць фіксаваны працэнт супрацоўнікаў, якіх павінны звальняць штогод.

Блэк-лісты таксама не вынаходніцтва Microsoft. Такія, напрыклад, існуюць у Meta. У кампаніі Марка Цукерберга працуюць спецыяльныя сістэмы, у якіх фіксуюцца шанцы звольненых супрацоўнікаў быць прынятымі назад. Там ім прысвойваюцца пазнакі, якія паказваюць, напрыклад, што іх звальненне — гэта карысны адток, і тэг, які забараняе наймаць іх паўторна.