Сундар Пічаі расказаў, як ён і Google рэагавалі на запуск ChatGPT

Падчас канферэнцыі Dreamforce, якую штогод праводзіць Salesforce, яе CEO Марк Бэніоф спытаў Пічаі, што адбывалася ў Google, якая на той момант была «бясспрэчным лідарам у ШІ», калі «гэтая маленькая кампанія з Сан-Францыска пад назвай OpenAI выпусціла ChatGPT».

Пічаі адказаў, што Google тады ўжо сур’ёзна прасунулася ў распрацоўцы ШІ і мела ўласную ўнутраную версію чат-бота. «Але трэба аддаць належнае OpenAI: яны выпусцілі яго першымі», — сказаў генеральны дырэктар.

ChatGPT з’явіўся ў канцы 2022 года і стаў сур’ёзным выклікам для Google, чыё лідарства ў сферы ўпершыню аказалася пад пытаннем. New York Times пісаў, што тады ў кампаніі абвясцілі «надзвычайнае становішча», а Пічаі перанакіраваў некалькі каманд на прыярытэтныя ШІ-праекты.

Ён параўнаў сітуацыю з іншымі момантамі, калі маладыя кампаніі нечакана скаланалі галіну. Напрыклад, у 2006 годзе Google працавала над пошукам па відэа, і раптам з’явіўся YouTube, а на фоне папулярнасці Facebook узнік Instagram. Пазней Google купіла YouTube, а Facebook — Instagram.

«Мы разумелі, што ў нейкім іншым свеце, верагодна, выпусцілі свой чат-бот некалькімі месяцамі пазней. Але [да моманту з’яўлення ChatGPT] мы не давялі яго да таго ўзроўню, каб можна было выпусціць і сказаць, што гэта годна Google. Тады ў ім было яшчэ занадта шмат праблем», — працягваў Пічаі. Пры гэтым ён падкрэсліў, што Google ужо тады актыўна інвеставала ў ШІ — ад даследчых каманд да ўласных чыпаў і інфраструктуры, таму была гатова да новага этапу тэхналогій.

«Для мяне, калі выйшаў ChatGPT, насуперак таму, што думалі астатнія, гэта была нагода для радасці — я зразумеў, што акно магчымасцей зрушылася», — сказаў ён.

Па словах Пічаі, Google не спяшалася выпускаць уласнага чат-бота адразу пасля ChatGPT, паколькі для кампаніі «рэпутацыйныя рызыкі вышэй», чым для стартапа. У сакавіку 2023-га яна ўсё ж выкаціла Bard, які пазней перайменавалі ў Gemini. Але па рэлізу не было падобна, што ў кампаніі на адной хвалі з Пічаі ў плане годнасці і рэпутацыі.

Тым часам пашукавікі здаюць пазіцыі чат-ботам і іншым ШІ-асістэнтам — карыстальнікі ўсё часцей аддаюць перавагу ім для адказаў на запыты. Аналітыкі міжнароднай некамерцыйнай кампаніі Digital Content Next палічылі, што за першую палову 2025 года рэферальны трафік (пераходы па спасылках на старонніх рэсурсах) скараціўся амаль на 25% у параўнанні з тым жа перыядам 2024 года.