Кампанія прэзентавала новыя, больш даступныя версіі сваіх папулярных электрамабіляў — кросовера Model Y і седана Model 3. Пасля падзення продажаў і адмены льгот Трампам вытворца спрабуе стымуляваць попыт.
Кампанія прэзентавала новыя, больш даступныя версіі сваіх папулярных электрамабіляў — кросовера Model Y і седана Model 3. Пасля падзення продажаў і адмены льгот Трампам вытворца спрабуе стымуляваць попыт.
Цяпер базавая Model Y Standard каштуе $39 990, а Model 3 Standard — $36 990, паводле дадзеных на сайце кампаніі. Бюджэтныя версіі атрымалі больш простае аздабленне і абсталяванне: прыбраны панарамны дах, скураныя сядзенні, светлавыя панэлі і функцыя Autosteer.
Акумулятар Model Y Standard забяспечвае запас ходу да 321 мілі (516 км) — на 36 міль менш, чым у версіі Long Range. Унутры — тэкстыльныя сядзенні (веганская «скура» апцыянальна) і механічная рэгуліроўка люстэркаў. Tesla разлічвае пачаць пастаўкі ў снежні 2025 — студзені 2026 года.
Рашэнне аб зніжэнні цэн звязана з падзеннем продажаў і стратай федэральнага падатковага крэдыту $7 500, адмененага новым законам адміністрацыі Дональда Трампа. Пры гэтым кампанія сутыкаецца з моцнай канкурэнцыяй — як у ЗША, так і ў Еўропе і Кітаі, дзе вытворцы кшталту BYD, Hyundai і Volkswagen прапануюць электрамабілі танней за $30 000.
Аналітыкі лічаць, што цяперашнія цэны ўсё яшчэ зашмат высокія, каб прыцягнуць новую аўдыторыю. «Гэта хутчэй цэнавы рычаг, чым прадуктовы прарыў», — адзначыў Шэй Балоор з Futurum Equities.
Нягледзячы на чаканні гучнага анонсу, акцыі Tesla ўпалі на 4,5%. Раней яны раслі на фоне чутак аб новым прадукце пасля тызераў кампаніі. Інвестары спадзяваліся пачуць навіны пра іншыя мадэлі — напрыклад, пра наступнае пакаленне Roadster, абяцанае Іланам Маскам яшчэ ў 2017 годзе, ці пра распрацоўку робататаксі.
На фоне спаду продажаў і старэючага мадэльнага шэрагу Tesla ўсё актыўней прасоўвае вобраз тэхналагічнай кампаніі, што развівае штучны інтэлект, робататаксі і гуманоідных робатаў Optimus. Аднак, як адзначаюць эксперты, менавіта новыя недарагія электрамабілі застаюцца ключом да росту даходаў у бліжэйшыя кварталы.
Рэлацыраваліся? Цяпер вы можаце каментаваць без верыфікацыі акаўнта.