У Dell — мінус 25 тысяч супрацоўнікаў за два гады

Па стане на 31 студзеня ў Dell па ўсім свеце працавала каля 108 тысяч супрацоўнікаў. Для параўнання, у лютым 2024 года глабальны штат кампаніі складаў 120 тысяч, што азначае зніжэнне на 10% за год. Аднак у лютым 2023-га ў кампаніі было 133 тысячы работнікаў. Такім чынам, за два гады штат скараціўся на 19%.

Гэта адбылося як у выніку масавых скарачэнняў і абмежавання знешняга найму, так і дзякуючы ўзмацненню палітыкі вяртання ў офіс (RTO). У жніўні кампанія праводзіла рэструктурызацыю аддзела продажаў, падчас якой супрацоўнікам паведамілі, што ім варта рыхтавацца да эры ШІ. Колькі чалавек тады страцілі працу, не ўдакладнялася. Што датычыцца вяртання ў офіс, некаторыя супрацоўнікі адмовіліся ад павышэння, каб застацца на дыстанцыйнай працы, а частка вырашыла шукаць іншую працу.

У каментары Business Insider прадстаўнік Dell адзначыў, што кампанія прымае меры для зніжэння выдаткаў і павышэння эфектыўнасці, у тым ліку аб’ядноўвае каманды і пераглядае прыярытэты ў размеркаванні інвестыцый.

Выручка Dell за 2025 фінансавы год вырасла на 8%, але з пачатку каляндарнага года яе акцыі ўпалі на 15%.