Зумеры маюць праблемы з тэхналагічнымі навыкамі: даследаванне
Людзі пакалення Z выраслі ў стагоддзе інтэрнэту і ад нараджэння былі акружаныя гаджатамі. Але як супрацоўнікі яны далёка не заўжды на «ты» з сучаснымі тэхналогіямі, як прынята лічыць. Нават наадварот, распаўсюджанае сярод старэйшых пакаленняў меркаванне пра зумераў выклікае ў іх няёмкасць. Да такой высновы прыйшлі аўтары даследавання для HP, якія апыталі 10 тысяч офісных працаўнікоў у 10 краінах, уключна з ЗША і Вялікабрытаніяй.
20% рэспандэнтаў у веку 18-29 гадоў адчуваюць асуджэнне навакольных пры ўзнікненні якіх-небудзь тэхнічных праблем. Сярод людзей 40+ гадоў такіх было толькі 4%. Акрамя таго, 25% прадстаўнікоў першай узроставай групы сказалі, што пастараліся б пазбегнуць нарады, калі б ім здавалася, што іх тэхнічныя сродкі могуць іх падвесці. У суседняй групе такіх выявілася толькі 6%.
У HP бачаць некалькі прычын такога пачуцця сораму ў міленіялаў (яны назвалі яго «tech shame»). Па-першае (гаворка пра аддаленую працу), старэйшыя калегі хутчэй за ўсё могуць дазволіць сабе купіць дамоў больш якасныя дэвайсы, чым моладзь.
Па-другое, тым, хто пачаў прафесійную кар’еру падчас ці ўжо пасля пандэміі, можа не хапаць упэўненасці ў сабе: іх першая праца ад самага пачатку была цалкам у віртуальным фармаце, яны менш за папярэднія пакаленні ўжывую кантактавалі з калегамі і начальствам, і ў іх было менш магчымасцей набірацца досведу ў старэйшых калег і ментараў.
У HP заклікалі кампаніі актыўней праводзіць тэхнічную падрыхтоўку маладых супрацоўнікаў. «Маладыя спецыялісты, можа, і больш камфортна сябе адчуваюць у лічбавым асяроддзі, перш за ўсё ў сацсетках. Але гэта далёка не заўжды распаўсюджваецца на прафесійныя інструменты», — адзначылі там.
Цалкам магчыма, што да пачатку працы маладыя супрацоўнікі ніколі не карысталіся інструментамі для відэаканферэнцый або каналамі Slack. Для павышэння эфектыўнасці працы іх варта навучаць рабоце са сродкамі сумеснай працы.
Спецыялісты ў паводзінных навуках падкрэсліваюць, што стэрэатып пра тэхналагічную падкаванасць зумераў і міленіялаў заснаваны на тым, што яны багата часу бавяць з гаджатамі ў руках. Эксперты называюць гэта вялікай памылкай: «На жаль, ані прагляд відэа ў TikTok, ані гульня ў Minecraft не навучаюць тэхналогіям».
Эксперты таксама дзівяцца таму, што маладыя супрацоўнікі звычайна больш саромеюцца звярнуцца да іншых па дапамогу, чым іх старэйшыя калегі — хаця здаецца, што мае быць наадварот. Гэта адбываецца ў тым ліку таму, што на зумераў цісне згаданы стэрэатып.
Читать на dev.by