Адток айцішнікаў працягвае запавольвацца (ужо ад пачатку вайны)

За дзевяць месяцаў, паводле нашых ацэнак, з сектара «выпала» каля 5,5 тысяч спецыялістаў — у 2,5 разы менш, ніж за такі ж перыяд 2022. 

Звальненні

ІТ-кампаніі сёлета скарачаюць свае каманды ў Беларусі не так інтэнсіўна, як летась. Калі ў 2022 у сярэднім у ІТ звальняліся 2,4 тысячы чалавек на месяц, то сёлета менш за 1,5 тысячы на месяц. Пры гэтым ад лета колькасць звольненых спецыялістаў у ІТ-сектары фактычна апусцілася да даваеннага ўзроўню (студзень-люты 2022) — каля 1,3 чалавек на месяц. 

Усяго ад пачатку года з ІТ-кампаній звольнілася, паводле нашых ацэнак, каля 12,5 тысяч спецыялістаў — амаль у 2 разы менш, ніж за дзевяць месяцаў мінулага года.

Найманне

Колькасць працаўладкаваных спецыялістаў у ІТ-кампаніі сёлета моцна не змяняецца ад месяца да месяца. У нейкай ступені анамальнымі былі толькі студзень і жнівень. У студзені найманне, мяркуючы са статыстыкі, было на дне. ІТ-кампаніі ўзялі на працу менш за 700 спецыялістаў (антырэкорд у 2023).

У жніўні колькасць працаўладкаваных спецыялістаў упершыню ў гэтым годзе перавысіла 1000+ чалавек. У астатнія месяцы найманне вагалася ў межах 750-860 чалавек на месяц. Невялікі спад быў у перыяд ад красавіка да ліпеня.

Усяго за студзень–верасень ІТ-кампаніі ўзялі на працу больш за 7,2 тысячы спецыялістаў, а за такі ж перыяд 2022 года — 10,1 тысячы чалавек, або амаль на 60% больш.

Чысты адток

Усяго ад пачатку года ІТ-сектар страціў каля 5,5 тысяч чалавек. Для параўнання: за дзевяць месяцаў мінулага года адток перавысіў 13 тысяч чалавек. 

Адток спецыялістаў з ІТ-кампаній пачаў запавольвацца яшчэ ад студзеня. Калі амаль усю другую палову мінулага года ІТ-сектар губляў штомесяц ад 1,1 тысячы да 1,6 тысячы спецыялістаў, то ў першым квартале — менш за 750 на месяц (у сярэднім). Апошнія тры месяцы адток мінімальны сёлета — менш за 500 спецыялістаў на месяц.

Тут можна вылучыць некалькі фактараў. Па-першае, многія айцішнікі, якія планавалі рэлакейт, ужо з’ехалі. Па-другое, з усяго відаць, шматлікія кампаніі калі не згарнулі цалкам праграм рэлакацыі, то моцна скарацілі бюджэты на пераезд і рэлакуюць толькі кропкава. У замежных офісах многіх аўтсорс-кампаній дэфіцыт праектаў, гэта абцяжарвае пераезд спецыялістаў, якія хацелі б рэлакавацца ўнутры сваёй кампаніі. 

Усяго ад пачатку вайны ва Украіне ІТ-сектар страціў ужо больш за 22,6 тысячы спецыялістаў.

Хто звальняў

Згадалі, якія вядомыя кампаніі звальнялі супрацоўнікаў сёлета.

EPAM пры канцы кастрычніка прыняў рашэнне скараціць каля 2% штату ў Беларусі. Паводле слоў крыніц, кампанія патлумачыла, што вымушаная пайсці на скарачэнні, каб аптымізаваць выдаткі. Ва ўмовах складанай геапалітычнай абстаноўкі, эканамічнага крызісу і скарачэння бюджэтаў заказчыкамі EPAM не можа забяспечыць працай усіх супрацоўнікаў. 

Дакладная колькасць супрацоўнікаў, якіх кампанія звольніць, не вядомая. Паводле слоў адной з крыніц, «калі 2%, то скарачэнне закране не менш за 100 чалавек». 

iTechArt Group запусціла антыкрызісны план, каб зэканоміць бюджэт і аптымізаваць выдаткі праз негатыўныя працэсы на сусветным рынку. У рамках гэтага плана кампанія звольніла частку супрацоўнікаў. 

EffectiveSoft звольніла некаторых супрацоўнікаў праз недахоп праектаў і падзенне даходаў. Кампанія яшчэ пры канцы мінулага года запусціла антыкрызісны план і звольніла больш за 20 супрацоўнікаў мінскага офіса, якія былі на бэнчы. Новая хваля скарачэнняў закранула каля 40 спецыялістаў. 

Evolution Gaming — распрацоўшчык гульняў для анлайн-казіно — спачатку звольніў усіх Process Master у групе кампаній і скараціў больш за два дзясяткі спецыялістаў з каманд QA у мінскім офісе. Пазней кампанія абвясціла аб сыходзе з Беларусі. Закрыццё мінскага офіса закране каля 80 спецыялістаў.

Innowise Group у рамках аптымізацыі звольніла частку супрацоўнікаў, у якіх не было праектаў. Кампанія патлумачыла, што рэагуе на запыты рынку. «Напрыклад, цяпер не так запатрабаваныя на рынку спецыялісты з англійскай ніжэйшай за B1, таму кагосьці мы адпускаем, але паралельна ў рамках гэтай жа тэхналогіі можам дабіраць», — тлумачыў dev.by стратэгію кампаніі CEO Innowise Group Павел Арлоў.

У гэты ж спіс можна дадаць вядомых прадуктавікоў, а таксама кампаніі са спісу недружалюбных краін, уключаючы амерыканскія. 

Хто наймае 

Не ўсе кампаніі, што захавалі беларускія офісы, замарозілі найманне ў РБ. Паглядзелі, якіх спецыялістаў для наймання ў Беларусі шукаюць асобныя кампаніі з топ-50. 

Itransition размясціла на сайце пяць вакансій, дзе сярод прапанаваных лакацый фігуруе Беларусь. Кампаніі патрэбныя Data Engineering, Software development і Sales and marketing.

На сайце Міжнароднага дзелавога альянсу (экс-IBA ў РБ) адная вакансія. Кампанія шукае архітэктара плацежных сістэм у сферы грамадскага транспарту.

На сайце SoftClub усяго дзве вакансіі для працы ў Беларусі — для Junior System Analyst і Middle Full-Stack Developer.

SOFTSWISS у кастрычніку–лістападзе размясціла каля 10 вакансій, дзе ў пераліку лакацый на выбар пазначаная Беларусь. Кампанія шукае менеджараў (напрыклад, Feature Manager, Gapp manager, Partnership Manager), Customer Support Specialist, Information Security Specialist)

Innowise Group размясціла на сайце 12 вакансій, дзе можна абраць у тым ліку офісы ў Беларусі (Брэст, Мінск, Віцебск, Гомель). Кампаніі патрэбныя распрацоўшчыкі, Project Manager, QA. 

На сайце кампаніі «Сістэмныя тэхналогіі» мы знайшлі дзве вакансіі — для Support Specialist і сеткавага інжынера.

dev.by, як і іншым сумленным медыя, сёння вельмі складана: рэдакцыя працуе па-за межамі краіны, а нашыя рэкламныя даходы скараціліся ў некалькі разоў. Але мы даем рады — з вашай дапамогай. Гэта вы дзеліцеся з намі інфанагодамі, думкамі, досведам, часам, увагай і данатамі.

Праз Patreon. 

З Беларусі — праз Donorbox.

І яшчэ крыптой, тут кашалькі.

Дзякуй, што прачыталі гэтае паведамленне.