У Берліне не стае жытла, і гэта пагражае мясцовай айці-экасістэме

Праз сітуацыю, што склалася на рынку гарадскога жытла, стартапы пачынаюць губляць важную канкурэнтную перавагу перад такімі тэхнахабамі, як Лондан, Парыж і Крэмніевая даліна. Берлін стаў трэцім з велічыні ІТ-цэнтрам Еўропы шмат у чым дзякуючы даступнейшаму кошту жыцця.

Калі раней пошук чагосьці сталага мог займаць тыдні, то цяпер тыя, хто прыехаў у нямецкую сталіцу, захрасаюць у часовым жытле на месяцы — або марнуюць больш за гадзіну на дарогу, а некаторыя папросту вяртаюцца дадому. І хоць для большасці насельніцтва горада галоўная праблема — арэнда, якая расце, для яго ІТ-сектара гэта ў прынцыпе адсутнасць вольнага жытла, якое перакрэслівае вышэйшыя заробкі.

75% жыхароў Берліна жывуць у здымным жытле. Паводле некаторых ацэнак, у горадзе не стае 106 тысяч адзінак жытла. Некаторыя працадаўцы пакрываюць выдаткі на транспарт супрацоўнікам, якія жывуць па-за межамі Берліна.

Як піша выданне, у жытловы крызіс у Берліне зрабіў «унёсак» і ІТ-сектар: мясцовыя кампаніі наймалі айцішнікаў тысячамі на заробкі вышэйшыя, ніж у большасці мясцовых жыхароў. Ад сярэдзіны нулявых, калі ў Берліне пачаўся ІТ-бум, насельніцтва горада павялічылася больш як на 300 тысяч чалавек, а кошт арэнды больш як падвоіўся.

Глабальны эканамічны крызіс прымушае берлінскія стартапы засяродзіцца на прыбытковасці і выдатках, а крызіс на рынку жытла моцна павышае кошт наймання. Апошнімі месяцамі скарачэнні для памяншэння выдаткаў правялі стартапы Delivery Hero, Trade Republic Bank і SoundCloud, якія базуюцца ў Берліне

Сярод рэлакантаў ёсць трэнд здымаць кароткатэрміновае жытло на даўжэйшы тэрмін, прыкладна паўгода — амаль удвая даўжэй, ніж два гады таму. Такі попыт дазваляе ўладальнікам арэнднага жытла падвойваць кошт кароткатэрміновых мэбляваных варыянтаў, праз што прапанова доўгатэрміновага жытла яшчэ больш скарачаецца.

Берлін падаражэў, але ў параўнанні з іншымі тэхнахабамі паводле кошту жыцця ўсё роўна выглядае лепшым, адзначае Bloomberg. Сярод іншых яго пераваг — шчодрая сістэма сацзабеспячэння, што каштоўна на тле масавых звальненняў у кампаніях накшталт Microsoft, Meta і Amazon.