Алеся Чапкевич bel 2 лютага 2026, 13:48

У Нацбанку прадставілі новы знак беларускага рубля. І патлумачылі, які ў яго закладзены сэнс

Кіраўнік Нацбанка Раман Галоўчанка прадставіў новае абазначэнне беларускага рубля.

Паводле яго слоў, ранейшы сімвал у выглядзе дзвюх лацінскіх літар BR быў зацверджаны ў 2005 годзе, але не прыжыўся. З-за гэтага развялося шмат усялякіх напісанняў: «бел. руб.», BYN, «БР» і іншых, але так не павінна быць. Таму, даў зразумець Галаўчэнка, у гэтым пытанні наладзілі сапраўдную дэмакратыю — далі людзям магчымасць самім прапанаваць свой сімвал для нашага рубля, а потым яшчэ і выбраць лепшы праз галасаванне, каб яго дакладна прынялі ў грамадстве.

«Таму сімвал абраны. Ён, на наш погляд, адпавядае ўсім крытэрыям: прастата, зручнасць, асацыятыўнасць з рэспублікай. Тут ёсць і літара „Б“, якая з’яўляецца загалоўнай у назве нашай краіны Беларусі. І гарызантальная рыса, якая сімвалізуе ўстойлівасць, стабільнасць. Ну і ў цэлым гэты знак вельмі перагукаецца з сімваламі іншых грашовых адзінак іншых дзяржаў, але ў той жа час кажа ці сведчыць пра ўнікальнасць менавіта нашага беларускага рубля», — патлумачыў чыноўнік.

Ён сказаў, што Нацбанк будзе дапамагаць прасоўваць новы сімвал: «Будуць адпаведныя рэкамендацыі па яго выкарыстанні ў касавых, плацежных, фінансавых дакументах. Вектарнае адлюстраванне эталоннага знака будзе даступна для спампоўвання на афіцыйным сайце Нацыянальнага банка Беларусі. Будзем працаваць з Міністэрствам антыманапольнага рэгулявання і гандлю для таго, каб былі адпаведныя метадычныя рэкамендацыі па яго ўкараненні для абазначэння цэн». Але дадаў, што рабіцца гэта ўсё будзе не «фарсіравана», а «мякка, але настойліва».

Галаўчэнка спадзяецца, што ўжо вельмі хутка гэты знак з’явіцца на ўсіх цэнніках. І падкрэсліў, што яго вельмі зручна пісаць ад рукі, што павінна спрыяць яго шырокай пазнавальнасці. Сказаў, што гэты знак можа афіцыйна выкарыстоўвацца па ініцыятыве людзей і кампаній з моманту прыняцця пастановы праўлення Нацбанка. Такая пастанова была прынята 27 студзеня, але пакуль не апублікавана (а ўступае ў сілу менавіта тады).

Заяўкі на новы знак прымаліся ад усіх жадаючых, паступіла амаль 2,7 тысячы. Конкурсная камісія выбрала шортліст з пяці лепшых, далей наладзілі галасаванне на сайце рэгулятара. Паўдзельнічала больш за 22 тысячы чалавек.