У Расіі закрываюцца аўтарызаваныя сэрвісныя цэнтры Apple

Паводле даных «Известий», у студзені закрыліся сэрвісныя цэнтры Apple у Маскве MacLabs і B2X у Санкт-Пецярбургу. MacLabs перастаў прымаць прылады на абслугоўванне 9 студзеня. З цяжкасцямі сутыкнуўся іншы маскоўскі сэрвіс — «Брабралаб». Ягоны заснавальнік і гендырэктар Зміцер Кір’янаў абвясціў кампанію па зборы сродкаў на працяг дзейнасці.

Раней Apple увяла абмежаванні для Расіі праз вайну ва Украіне. На тэрыторыі краіны перастала працаваць афіцыйная інтэрнэт-крама. Мінпрамгандаль уключыў прадукцыю Apple у пералік тавараў для паралельнага імпарту. Сетка re:Store пачала закрываць крамы ў Расіі, патлумачыўшы гэта перабудовай лагістыкі. У сакавіку сэрвісныя цэнтры Apple перасталі абслугоўваць паводле гарантыі MacBook і iPad праз недахоп дэталяў.