У Twitter засталося менш за 550 штатных інжынераў і толькі 20% супрацоўнікаў, якія былі да прыходу Маска

Яшчэ 1400 супрацоўнікаў Twitter лічацца непрацуючымі — яны працягваюць атрымліваць заробак, але не выконваюць ранейшых функцый. Многія з іх вырашылі пакінуць кампанію пасля «хардкорнага» ўльтыматуму новага ўладальніка сацсеткі Ілана Маска і скасавання аддаленай працы. Пасля куплі бізнэсовец скараціў палову штату Twitter. Ён абяцаў спыніць звальненні, але яны ўсё роўна працягваюцца, хоць і не ў такіх маштабах. Паводле паведамлення Insider, найбліжэйшымі тыднямі «пад нож» адправяць 50 супрацоўнікаў прадуктовага падраздзялення.

Да ўгоды з Маскам у кастрычніку Twitter налічваў прыкладна 7500 супрацоўнікаў. То-бок за некалькі месяцаў кампанія страціла каля 80% штату.

Акрамя гэтага, у Twitter пакліканыя каля 130 працаўнікоў іншых кампаній мільярдэра — Tesla, SpaceX і The Boring Company, а таксама кадры з венчурных фондаў ды іншых кампаній.

Маск абвяргае інфармацыю выдання. Паводле яго слоў, цяпер у Twitter 2300 супрацоўнікаў, якія працуюць, а каманда па даверы і бяспецы налічвае сотні супрацоўнікаў і тысячы вонкавых падрадчыкаў. А з іншых кампаній у Twitter занята менш за дзясятак чалавек.

Інжынеры, з якімі гутарыў CNBC, кажуць, што праз буйныя страты ў сваіх шэрагах Twitter будзе складаней падтрымліваць стабільную працу і выкочваць новыя функцыі — у тым ліку таму, што кодавая база сацсеткі велізарная, для падтрымкі розных яе кампанентаў неабходна ведаць мноства моў і платформаў, і проста таму, што складана навучаць пачаткоўцаў, калі сышло столькі людзей з патрэбнай экспертызай.