Сярэдні чэк — да 15 тыс. долараў, дапамагаем толькі беларусам. Гутарым з інвестарам пра перазапуск Angels Band
Да 2020 года ў Беларусі паспяхова працавала аб’яднанне інвестараў Angels Band. На піку ў арганізацыю ўваходзіла каля 100 бізнэсменаў, а ў пітчынг-сесіях «бэнда» паўдзельнічала 1200 праектаў.
Цяпер Angels Band 2.0 адраджаецца ў Еўропе, каб дапамагаць беларускім стартапам на ранняй стадыі. Аб планах, інвестыцыях і цяжкасцях з сінім пашпартам гутарым з бізнэс-анёлам Кірылам Валошыным.
Новы-стары Angels Band
— Ідэя перазапуску Angels Band у Еўропе з’явілася даўно. На канчатковае рашэнне паўплывалі два моманты.
Па-першае, бізнэс-анёлы пасля ад’езду з Беларусі працягвалі камунікаваць нефармальна: мы перыядычна сустракаліся ў Вільні і на івэнтах у іншых краінах.
Па-другое, супольнасць анёльскіх інвестараў — важная частка венчурнай экасістэмы. У беларускай супольнасці яна даволі сырая, і ва ўмовах «венчурнай зімы» для стартапа на ранняй стадыі падняць інвестыцыі — гэта цэлы чэлендж.
Паводле даных Crunchbase, па аб’ёме інвестыцый у стартапы ва ўсім свеце першы квартал 2024 года стаў адным з найгоршых за апошнія шэсць гадоў.
Аб’ём пасяўных і анёльскіх інвестыцый у свеце за гэты перыяд перавысіў $7 млрд — на 15% менш, чым у першым квартале 2023 года.
У Еўропе ў першым квартале 2024 года аб’ём венчурных інвестыцый склаў $11,8 млрд. Гэта крыху больш, чым у чацвёртым квартале 2023 года, але на 10% менш у параўнанні з першым кварталам 2023 года.
Нашая асноўная мэта — дапамагаць праектам, якія толькі што перайшлі ад ідэі да стварэння прататыпа. Так, Angels Band нельга разглядаць як выратавальны круг. Мы не гарантуем, што ўсе праекты трапяць на пітч-сесіі або атрымаюць грошы. Але нашыя івэнты — гэта яшчэ адная магчымасць паказаць сябе і павысіць шанцы на першы раўнд інвестыцый.
За першы месяц да нас далучылася ўжо каля 20 анёлаў. Гэта паспяховыя бізнэсмены, у якіх ёсць кампетэнцыі і вопыт у галіне венчурных інвестыцый. У планах вярнуць хаця б палову анёлаў, якія ўдзельнічалі ў супольнасці на піку яе дзейнасці ў Беларусі — тады нас было каля 100.
Як працуе Angels Band 2.0
— Стартапы дасылаюць нам заяўкі і пітч-дэкі (некаторым мы самі прапаноўваем паўдзельнічаць). Пяць найбольш цікавых праектаў адбіраюцца для пітчынг-сесій. Сесіі праводзім двойчы на месяц (ужо дзве правялі).
Акрамя таго, бізнэс-анёлам даступная платформа, на якой сабраныя ўсе заяўкі ад стартапаў. Інвестары могуць самастойна вывучаць праекты і знаёміцца з фаўндарамі.
Раз на месяц мы праводзім ментарынг-сесіі, на якія адбіраецца пяць праектаў. Каманды атрымліваюць зваротную сувязь, парады, размаўляюць з ментарамі. Зноў жа ёсць шанец прывабіць бізнэс-анёла і атрымаць інвестыцыі.
На пітчынг- і ментарынг-сесіі могуць трапіць стартапы з любых сфер (але абавязкова працаваць па-за межамі Беларусі). Натуральна, важныя ідэя, яе перспектыўнасць, памер рынку і каманда. Пажадана, каб стартап ужо прасунуўся ад ідэі да стварэння MVP.
Пяць перспектыўных праектаў могуць трапіць на папулярныя канферэнцыі: WebSummit, Slash і TechChill. Angels Band аплачвае дарогу, пражыванне і квіткі на івэнт. Таксама мы дапаможам з арганізацыяй нэтворкінгу ў часе канферэнцыі.
У планах адабраць каля тузіна беларускіх праектаў і паказаць іх літоўскім фондам і анёлам. Акрамя таго, мы плануем правесці вясной наступнага года ў Варшаве Angel Band Summit. Хочам сабраць у афлайне стартапы, старых і новых бізнэс-анёлаў. Спадзяемся, з гэтага народзіцца нейкая колькасць сіндыкатаў і інвестыцый.
Запланаваныя дзве адукацыйныя праграмы сумесна з Еўрапейскім банкам рэканструкцыі і развіцця (ЕБРР). Адная для пачаткоўцаў бізнэс-анёлаў, другая — для стартапаў.
60% стартапаў — з Польшчы
— Ад моманту абвяшчэння перазапуску Angels Band мы атрымалі блізу 50 анкет ад беларускіх стартапаў, з іх блізу 60% — з Польшчы. Былі заяўкі з Літвы, Кіпра, Грузіі.
Атрымалі і некалькі заявак ад стартапаў з фаўндарамі з Фінляндыі, Чэхіі і Польшчы. Але мы іх нават не разглядалі, бо нашая мэта — падтрымка беларусаў. Хоць на цікавы праект з Украіны мы б абавязкова звярнулі ўвагу.
Якія стартапы ўжо паўдзельнічалі ў сесіях Angels Band
Стартапы, адабраныя на першую пітчынг-сесію:
- Reputy: «гаманец талентаў», дапамагае кандыдатам вызначыць свае софт-скілы і пацвердзіць іх для хуткага пошуку першай працы або змены сферы дзейнасці;
- Taksinfinity: праграма, якая дапамагае фаўндарам хутка сабраць профілі адпаведных інвестараў з падобнымі ўгодамі;
- Qlode: AI-фэшан асістэнт і кансультант, які абяцае знізіць узровень вяртанняў у анлайн-крамах і колькасць непатрэбнага адзення на 30%;
- Hugs: мабільная праграма, якая дапамагае падтрымліваць добрыя адносіны з калегамі і сябрамі; падкажа, што каму напісаць і які падарунак выбраць;
- Govar: праграма, якая дазваляе падключыцца да іншых карыстальнікаў, якія вывучаюць англійскую мову, для практыкі гутарковай мовы па відэасувязі.
Стартапы, адабраныя на першую ментарынг-сесію:
- Tradefulness: майндфулнэс і кантроль стрэсу для брокераў;
- AgriModem: софт для аўтаматызацыі сельскай гаспадаркі;
- Edberry: платформа-агрэгатар навучальных праграм;
- Plain: AI-дызайн-праекціроўшчык інтэр’еру, з падборам рэальных тавараў.
На якія інвестыцыі разлічваць
— Сярэдні чэк (ад аднаго бізнэс-анёла), думаю, будзе блізу 10-15 тысяч долараў. Звычайна на ўмовах канверсоўнай пазыкі.
SAFE (пагадненне пра будучы капітал) дазваляе зафіксаваць укладанні інвестара, пры гэтым не вызначаючы яго долю да таго часу, пакуль стартап не падыме equity-раўнда і не будзе названая яго канкрэтная ацэнка. Пасля гэтага грошы анёлаў ранняй стадыі канвертуюцца (звычайна з некаторым каэфіцыентам) у акцыі (долю) стартапа.
Сіні пашпарт — ці праблема для фаўндараў і інвестараў?
— Калі мы гаворым пра Міжнародны венчурны рынак, то ў большасці выпадкаў важнае не паходжанне фаўндара, а поспехі і патэнцыял стартапа.
Праблема не ў паходжанні стартапа праз «таксічнасць» краіны. Важнае іншае: перад фандрайзінгам вырашыць пытанні поўнай рэлакацыі актываў — каманды, інтэлектуальнай уласнасці, кліенцкай базы і г. д.
Інвестар ацэньвае рызыкі, а знаходжанне ў Беларусі важнага сябра каманды ў сённяшніх рэаліях рызыкоўнае. Няма гарантый, што аднойчы фаўндара або ўмоўнага маркетолага не забяруць на 15 сутак (або нават некалькі гадоў), што можа паставіць пад удар перспектывы праекта.
У Беларусі цяпер не найлепшая рэпутацыя ў свеце, прама скажам. І праца з камандай адтуль — гэта таксама і рэпутацыйныя рызыкі для інвестараў.
Таму калі стартап вырашыў фандрайзіць, то ён павінен пакуль развітацца з Беларуссю. І ў поўным складзе пераехаць у дэмакратычную краіну, ніяк не замяшаную ў вайне. Зарэгістраваць там юрыдычную асобу і прыцягваць грошы ўжо на новым месцы.
Читать на dev.by