Не выйшла ў першы дзень (было блага) — адклікалі офер. Ці гэта нармальна?

У каментары прыйшло 170+ чалавек і тая самая кампанія. 

Топікстартарка: «Самі прапанавалі перанесці мой выхад»

У сваім пасце эйчарка расказала, што адбылося. Яна прайшла сумоўе ў кампанію і пакінула па сабе добрае ўражанне — ёй амаль адразу зрабілі прапанову далучыцца да каманды. Вось што было далей:

— У сераду я прыехала ў офіс з пакетам дакументаў, схадзіла ў аддзел кадраў. Адсканіўшы ўсе дакументы, мне адказалі, што аформяць мяне заўтра, а пакуль я вольная і магу ехаць дадому. Ну акей — зайшла да кіраўніцы, яна трохі патлумачыла стан рэчаў, і я адухоўленая з’ехала дадому.

Бліжэй да вечара мне стала невыносна блага. Я зразумела, што атруцілася, пра што адразу ж паведаміла кіраўніцы. Яна спыталася, ці змагу я заўтра працаваць, на што я адказала, што вельмі паспрабую.

Зранку я зразумела, што ўсё яшчэ без сіл — і ўстаць з ложка для мяне цяпер як прабегчы марафон. Я спыталася [у кіраўніцы], ці магу я штосьці рабіць аддалена (гібрыд там прадугледжаны), ці мне ўсё ж варта прыехаць у офіс. Але яна сама прапанавала перанесці мой выхад на панядзелак. Я пагадзілася.

А ўвечары мне паступіла паведамленне ад яе, што гендырэктар распарадзіўся, каб мне адмовілі ў прыёме. Маўляў, супрацоўнік, у якога [ёсць] тэрміновыя задачы, не прыехаў у дзень прыёму.

Топікстартарка прыклала да свайго пасту перапіску з кіраўніцай. Тая заяўляе, што ў іх праца «выключна з офіса». Але ў каментарах эйчарка адзначае, што на сумоўі ёй казалі, што гібрыдны графік працы магчымы, — інакш яна б не пыталася, ці можа адзін дзень папрацаваць аддалена. 

Кам’юніці: «Лёс вас уратаваў» vs «За атручэннем у першы тыдзень наступяць дзве прастуды на месяц»

Пад пастом 170+ каментароў. Большасць карыстальнікаў лічыць, што аўтарцы пашанцавала («сам лёс вас уратаваў», — пішуць каментатары) — яна пазбегла долі рабыні на «галеры», і наогул гэта таксічная кампанія, у якой «няможна хварэць, а то звольняць». 

Частка каментатараў упэўненая: трэба было браць бальнічны — тады б усё было добра (насамрэч не, бо аўтарку пасту яшчэ не аформілі ў якасці супрацоўніцы кампаніі). 

Яшчэ частка кам’юніці задаецца пытаннем, што за тэрміновыя задачы былі ў эйчаркі ў першы ж дзень працы — няўжо вывучэнне ўнутраных інструкцый. 

Ёсць і тыя, хто стаў на бок кампаніі, бо «за атручэннем наступяць іншыя хваробы». Або не, яны на баку топікстартаркі, але ўсё ж мякка жураць яе: прапускаць першы дзень не камільфо, нават калі ты паўтруп, — трэба было «закінуцца лекамі і кавай і прыйсці ў офіс». 

Кампанія: «Вы працадаўцу насцярожылі»

У каментары прыйшоў і прадстаўнік той самай кампаніі, пра якую напісала дзяўчына. Вось што ён напісаў.

Кандыдатка парыравала, што ў асабістай гутарцы ёй не аднойчы казалі: графік працы можа быць гібрыдным. Ды і ўмоў яна не выстаўляла, наадварот, спыталася: ці варта ёй прыехаць у офіс. 

— Прабачце, калі ласка, што я не магу кантраляваць такія сітуацыі, як ратавірусная інфекцыя, паспрабую ў далейшым папрацаваць над гэтым. Як спецыяліст у hr-сферы я імкнуся быць больш чалавечнай у адносінах да кандыдатаў. У папярэдняй кампаніі бывала, што і 2 тыдні чакалі чалавека, які захварэў, і нічога, усё было акей, — напісала аўтарка пасту. 

Карыстальнікам таксама знайшлося, што напісаць кампаніі. У прыватнасці, іх цікавіла, чаму «выходны званок» — гэта тое, што мае насцярожыць працадаўцу. Але адказу больш не было. 

А з кім вы ў гэтай гісторыі — пішыце ў каментарах.

Выдаткуйце яшчэ 15 секунд, калі ласка.  

dev.by, як і іншым сумленным медыя, сёння вельмі складана: рэдакцыя працуе па-за межамі краіны, а нашыя рэкламныя даходы скараціліся ў некалькі разоў.

Але мы даем рады — з вашай дапамогай. Гэта вы дзеліцеся з намі інфанагодамі, думкамі, досведам, часам і ўвагай. А 170 чытачоў падтрымліваюць нас данатамі. У 2023 годзе мы хочам сабраць 1000 чытачоў-падпісчыкаў. 

Дапамагчы нам можна праз Patreon. 

З Беларусі — праз Donorbox.

І яшчэ крыптой, тут гаманцы.

Дзякуй, што прачыталі гэтае паведамленне.