У Amazon не задалося вяртанне ў офіс: супрацоўнікі скардзяцца на недахоп месцаў, парковак, крадзяжы, не мыюцца

Паводле іх слоў, паркоўкі ля офісаў забітыя, паставіць машыну няма куды. Некаторыя ў такім выпадку вяртаюцца дадому, некаторыя шукаюць, дзе стаць, на суседніх вуліцах. Чакаць пропускаў на карпаратыўную паркоўку даводзіцца месяцамі, але тым, каму гэта трэба, кампанія кампенсуе праязныя. Некаторыя падключаюцца да ранішніх сазвонаў яшчэ ў дарозе, бо трафік занадта моцны праз плынь супрацоўнікаў, што прыбываюць у офіс  — дабірацца даўжэй. Аднаго супрацоўніка не пускалі на карпаратыўныя шатлы, якія едуць да офіса, бо яны былі перапоўненыя.

Некаторым не хапае працоўных месцаў, не хапае крэслаў у офісах і канферэнц-залах, якіх таксама не хапае. У такіх выпадках людзі спрабуюць знайсці месца ў кавярні або ў калідоры. Менеджарам часам даводзіцца праводзіць асабістыя гутаркі перад усім офісам.

Некаторым не знаёмыя базавыя правілы офіснага этыкету. У офісе Amazon у Таронта супрацоўнікі скардзіліся ў Slack, што ў іх са сталоў пастаянна крадуць асабістыя рэчы. У аднаго, напрыклад, знікла клавіятура і мышка. Супрацоўнікі сарамацяць адно аднаго ў чатах — маўляў, людзі дарослыя і нядрэнна зарабляюць, а таксама заклікаюць калег добра хаваць свае рэчы. У Amazon ад каментароў з гэтай нагоды адмовіліся.

BI піша, што на Blind — пляцоўцы для ананімных водгукаў пра кампаніі — з’явіўся гайд па выжыванні ў офісе ад супрацоўнікаў Amazon пад назвай Operation: Don’t Be Тhe Office Menace. Сярод іншага яго аўтары заклікаюць калег не забываць пра асабістую гігіену — у прыватнасці, прымаць перад прыходам у офіс душ, «якога вы пазбягалі ад пачатку аддаленай працы», змываць за сабой у прыбіральні і хадзіць у абутку.

Варта адзначыць, што сярод супрацоўнікаў ёсць і тыя, хто вітае RTO-палітыку кампаніі. Паводле іх слоў, узаемадзеянне твар у твар сапраўды гуртуе каманду, дазваляе наладжваць сувязі і спрыяе развіццю культуры ментарства. Хтосьці кажа, што хадзіць у офіс карысна для захавання балансу паміж асабістым жыццём і працай, бо ёсць выразны падзел на працу і дом, хоць звычайна аддаленыя працаўнікі прытрымліваюцца прама процілеглага пункту гледжання. Аднак некаторыя нават у офісе большую частку часу бавяць у відэачатах і на анлайн-мітынгах, бо раскіданыя з камандай па розных офісах.

На карпаратыўных супрацоўнікаў прыпадае каля 350 тысяч з паўтарамільённага штату Amazon. Прадстаўнік кампаніі заявіў, што яна імкнецца, каб вяртанне людзей у офіс праходзіла «максімальна гладка». Раней выданне паведамляла, што не ўсе лакацыі Amazon паспелі падрыхтавацца да вяртання супрацоўнікаў, таму там працэс расцягнецца ў часе.