Маск атрымаў доступ да плацежнай сістэмы ЗША, паабяцаў згарнуць USAID

Гэта стане магутным інструментам кантролю і абмежавання выдаткаў амерыканскага ўрада ў руках каманды мільярдэра. Улады доўгі час адмаўляліся даваць яму такі доступ, і ў выніку спрэчкі адзін з высокапастаўленых чыноўнікаў міністэрства быў вымушаны сысці ў адстаўку.

У рамках сістэмы ад імя федэральных ведамстваў штогод размяркоўваецца каля $6 трлн. Доступ да яе абмежаваны вельмі невялікім колам супрацоўнікаў ведамства, паколькі яна ўтрымлівае персанальныя даныя мільёнаў амерыканцаў, якія атрымліваюць сацыяльныя і медыцынскія выплаты, падатковае вяртанне і іншыя сродкі ад урада.

Інфармацыю пацвердзіў сенатар-дэмакрат Рон Уайдэн. У пасце ў Bluesky ён адзначыў, што ў сістэме ёсць інфармацыя пра плацяжы дзяржпадрадчыкам, сярод якіх — канкурэнты кампаній Маска. У пятнічным лісце да Бесена сенатар выказаў асцярогу, што «палітычна матываванае ўмяшанне» ў сістэму можа «нанесці велізарную шкоду краіне і эканоміцы» і ўяўляе сабой «пагрозу нацыянальнай бяспецы» праз працу кампаній Маска на кітайскім рынку. Летась адміністрацыя Джо Байдэна вінаваціла Кітай у пранікненні ў крытычную інфраструктуру ЗША, перахопе размоў амерыканскіх чыноўнікаў і ўзломе ўласна Мінфіна.

Паводле паведамлення Washington Post, каманду, якая атрымала доступ да сістэмы, узначальвае Том Краўзе — гендырэктар Cloud Software Group. Яна валодае пастаўшчыком воблачных паслуг Citrix і шэрагам іншых кампаній.

DOGE не з’яўляецца часткай урада ЗША і выступае ў якасці вонкавага кансультацыйнага органа. У пасце ў Х ужо ў суботу Маск заявіў, не падаўшы ніякіх пацверджанняў сваіх слоў, што чыноўнікі Мінфіна ўхвалялі плацяжы «вядомым ашуканскім і тэрарыстычным групоўкам».

Акрамя гэтага, Маск паабяцаў закрыць Агенцтва ЗША па міжнародным развіцці (USAID). У пасце ў Х ён назваў ведамства «крымінальнай арганізацыяй», якой пара спыніць існаванне. Паводле паведамлення Fortune, Маск заяўляў, што арганізацыю немагчыма выправіць і можна толькі закрыць, і што нібыта гэтую ідэю падтрымлівае Дональд Трамп. The Guardian піша, што ў USAID таксама адмаўляліся даваць камандзе Маска канфідэнцыйную інфармацыю, і ў выніку два старшыя супрацоўнікі ведамства былі адхіленыя.