Гродна — упадабанае месца для падарожжаў не толькі беларусаў, але і гасцей з суседніх краін. Тут захаваліся па-сапраўднаму гістарычныя месцы: прыгожыя саборы, векавыя замкі на высокіх узгорках, цудоўныя вузкія вулачкі.
Офісы ў розных гарадах і нават краінах — класная магчымасць не толькі наведаць калег, але і пазнаёміцца з новай лакацыяй, натхніцца яе гісторыяй, культурай, гастранамічнымі вынаходствамі. Наша каманда выкарыстоўвае гэты шанец на ўсю катушку. Гэтым летам Head of Data Сяргей Ошын ўпершыню пабываў у Гродна, дзе сустрэўся з Jr. Data Software Engineer Пашам Бялевічам — адным з членаў каманды Godel GRODNO. Офіс Godel Technologies адкрыўся ў горадзе яшчэ ў 2017 годзе, і цяпер тут працуе вялікая (больш за 130 чалавек!), а галоўнае — дружная каманда.
Падарожжа атрымалася настолькі крутым, што Сяргей не змог не падзяліцца з намі ўражаннямі. Мы ж пайшлі далей і склалі гайд па каралеўскім Гродна: расказваем, якія саборы, замкі і вулачкі варта ўбачыць, дзе можна смачна перакусіць і правесці час з дзецьмі.
Куды адправіцца перш за ўсё ў Гродна?
Ну канечне на Замкавы ўзгорак! Менавіта тут узвышаецца Стары замак — адзіны захаваны каралеўскі замак на тэрыторыі Беларусі. Так-так, тут князь Вітаўт аднойчы выратаваўся ад пажару дзякуючы ручной малпачцы, а кароль Рэчы Паспалітай Стэфан Баторый ператварыў будынак у маштабную каралеўскую рэзідэнцыю.
Менавіта з боку Старога замка можна атрымаць асалоду ад маляўнічых відаў на галоўную раку Гродзеншчыны — Нёман. Шпацыруючы ўздоўж Нёмана, дарэчы, можам сустрэць і наш офіс Godel GRODNO — ён знаходзіцца ў БЦ «Бераг Нёмана».
Паглядзеўшы на Стары замак, нашы калегі падышлі аглядаць Новы, які стаіць насупраць, — месца гістарычных падзей еўрапейскага ўзроўню ў XVIII стагоддзі. Пабудаваны ў стылі ракако, замак увайшоў у гісторыю дзякуючы адмаўленню ад трона апошняга польскага караля Станіслава Аўгуста Панятоўскага ў 1795 годзе. Гэтым ён і скончыў шматвяковую гісторыю Рэчы Паспалітай і ВКЛ, а заадно і гісторыю свайго кахання з Кацярынай II.
Побач з замкамі размяшчаецца пажарная Каланча пачатку XX стагоддзя, пабудаваная пасля маштабнага пажара 1885 года. З гэтага часу яна сапраўды служыць у якасці часткі МНС. А роўна ў 12:00 кожны дзень з верхняй пляцоўкі вежы раздаецца мелодыя — так трубач ў адзенні пажарнага паведамляе гараджанам, што ў Гродна ўсё спакойна.
Насупраць Каланчы — Вялікая харальная сінагога, якую ў XVI стагоддзі пачаў будаваць італьянскі архітэктар Санці Гучы. З тых часоў храм перажыў два буйных пажары, але кожны раз адбудоўваўся нанова. Зараз гарадзенская сінагога — самая старая і буйная на тэрыторыі Беларусі.
«Барысаглебская царква аказалася на здзіўленне класнай. І гэта ж XII стагоддзе! Ад экскурсавода чуў, што гэта галоўная жамчужына горада. Рады, што ўдалося паглядзець на яе ўжывую», — падзяліўся з намі Сяргей. І праўда, Каложская (гэта яе другая назва) царква — самая старадаўняя з дзеючых праваслаўных цэркваў Беларусі. Ўпэўненыя, што вы чулі пра яе галоўную асаблівасць: мноства збаноў-галаснікоў, замураваных у сцены храма для лепшай акустыкі.
«Пасля агляду царквы можна прагуляцца ў прыгожым Каложскім парку — гэта выдатны фармат для шпацыра, напрыклад, з сям’ёй на выходных», — дадае Паша.
Зараз праходзім праз парк — і апынаемся на галоўнай плошчы горада.
Дамінанта плошчы — Кафедральны сабор Святога Францішка Ксаверыя (Фарны Касцёл), які мае ганаровы статус «базіліка мінор», які выдае папа рымскі. «Наш гід распавёў нам пра галоўныя разыначкі храма, — узгадвае Сяргей. — Тут адзін з самых старых у Еўропе вежавы гадзіннік і 21-метровы драўляны барочны алтар (таксама адзін з самых высокіх у Еўропе)». Усё так, а ўнутры храма — шыкоўнае афармленне ў стылі барока.
Побач з касцёлам знаходзіцца самая старая аптэка Беларусі (і адзіная аптэка-музей!) А пройдземся крыху па парку Жылібера — і спынімся каля адзінай, што дзейнічае ў Беларусі, Лютэранскай кірхі пачатку XX стагоддзя.
Недалёка ад кірхі знаходзіцца старадаўні корпус універсітэта Янкі Купалы, фасад якога абвіты дзявочым вінаградам, што надае яму асабліва загадкавы выгляд. А побач працякае рэчка Гараднічанка, уздоўж якой знаходзіцца ўтульны парк «Швейцарская даліна».
З вокнаў Godel GRODNO можам убачыць дзве васьмігранныя воданапорныя вежы Касю і Басю. Па адной з гарадскіх легенд, вежы былі названыя ў гонар двух работніц вадаканала: бухгалтара Басі і загадчыцы гаспадаркі Касі.
Немагчыма прайсці і міма гродзенскага драмтэатра, які мае форму перавернутай кароны. За гэта яго часта ўключаюць у рэйтынгі лепшай архітэктуры савецкага мадэрнізму.
Цяпер завяршаем нашу культурную праграму: шпацыруем па бруку пешаходнай Савецкай, разглядаем ўсмешкі турыстаў, занятых гараджан і мясцовых дзівакоў!
Нагуляліся ўдосталь! А дзе цяпер перакусіць?
Калі ўжо ўсё адно шпацыруем па Савецкай, то за кавай можам зайсці ў «Джэзва» або «Какава» — гэтыя кавярні нам раіць Паша. Там жа можна паспрабаваць і мясцовую выпечку.
У горадзе шмат кафэ і рэстаранаў традыцыйнай беларускай кухні. Напрыклад, за больш сур’ёзнымі стравамі нашы калегі раюць адпраўляцца ў рэстаран «Беласток». Асабліва хлопцы нахвальваюць іх дзеруны з курыцай, якія Сяргей, напрыклад, нават прывёз з сабой у Мінск.
А каманда Godel GRODNO любіць зайсці на абед у кафэ «Веранда», якое знаходзіцца на першым паверсе нашага гродзенскага офіса. У кавярні можна паспрабаваць як мясцовую, так і еўрапейскую кухню.
Завяршыць выдатныя выходныя Сяргей з Пашам вырашылі ў рэстаране «Замок Зеваны», які знаходзіцца ў 5 км ад Гродна на тэрыторыі маёнтка «Каробчыцы». Тут можна паласавацца дзічынай, якую выгадавалі на тэрыторыі сядзібы, зайсці ў сталярную майстэрню і кузню, а дзяцей прыцягнуць атракцыёны, спецыяльныя пляцоўкі і джунглі-парк.
А што кажуць нашыя вандроўцы?
«Канешне, Гродна моцна адрозніваецца ад Мінска, — рэзюмуе свае ўражанні Сяргей. — Адразу кінулася ў вочы такая вялікая колькасць узгоркаў, з якіх адкрываюцца цудоўныя віды. І стары горад тут добра захаваўся. У Мінску, каб знайсці нешта падобнае, трэба спецыяльна кудысьці выязджаць, а тут такое літаральна на кожным кроку. І пешаходная Савецкая — вельмі прыемнае месца з маленькімі барамі і рэстаранчыкамі».
«Так, Гродна — вельмі цікавы горад у плане гістарычных падзей і рэлігійнай спадчыны. Усе гэтыя векавыя замкі і саборы надаюць яму нейкую асаблівую магічную атмасферу», — дадае Паша.
Усё дакладна! Калі хочаце пранікнуцца гісторыяй, «каралеўскім» духам і проста трошкі запаволіцца ў патоку пастаяннай мітусні, то чакаем вас у Гродна.
Релоцировались? Теперь вы можете комментировать без верификации аккаунта.