«Спачатку было складана». Як цімлід папрасіла графік 4/3 — і кампанія пагадзілася

Ганна — распрацоўшчыца ў аўтсорс-кампаніі з беларускімі каранямі. Год таму яна адчула, што выгарала. Дзяўчына хацела сысці, а потым вырашыла прапанаваць працадаўцу кампраміс — яна застаецца, але на чатырохдзёнцы.

— Улічваючы, што мой галоўны кліент — з Ізраіля і не працуе ў пятніцы, мне пайшлі насустрач. 

Нашая сістэма прадугледжвала аплату за адпрацаваны час па гадзінах, таму па факце мой заробак паменшыўся, але мне не забаранялі працаваць больш у іншыя дні. То-бок я магла тыя ж 40 гадзін адпрацаваць і за 4 дні, галоўнае — у цэлым траціць на працу не менш за 32 гадзіны на тыдзень. 

Ганна кажа, што стала працаваць па 32 гадзіны. Прывыкла да новага графіку не адразу — спатрэбілася 4-6 месяцаў: «Спачатку складана было ў пятніцы не заходзіць у пошту і не праглядаць працоўных чатаў». А вось каманда пераключылася на новы фармат працы даволі хутка.

Ганна лічыць, што на чатырохдзёнцы стала працаваць нават эфектыўней. Яе прыклад выявіўся заразлівым — яшчэ два чалавекі ў кампаніі таксама дамовіліся пра падобны фармат працы. Але яны працавалі на іншых праектах, таму падрабязнасці Ганне невядомыя.

— Што дакладна ведаю: яны былі вельмі задаволеныя, — дадае айцішніца.

Вынік працы на чатырохдзёнцы такі: новы графік на цэлы год адклаў сыход Ганны з кампаніі, але «выгаранне, на жаль, перамагчы не здолеў». 

— Я атрымала магчымасць хоць на дзень адцягвацца ад інтэнсіўнай працы. Пятніца як быццам стала толькі маім днём, які я магла правесці ў цішыні і выдаткаваць на розныя прыемныя штукі — манікюр/педыкюр, чытанне кніг, садоўніцтва, шпацыры і гэтак далей. 

У цэлым, думка пра тое, што ўсе працуюць, а ты — не, у цябе самой у галаве як быццам бы асацыюецца з прагулам у школе. Але гэта ж дапамагае табе вучыцца шанаваць свой час удвая.

Ганна звольнілася і плануе нейкі час адпачыць — максімум да новага года. Але цікавыя прапановы разглядае, дадае распрацоўшчыца. Чатырохдзёнка — не самы галоўны крытэр для яе ў пошуку працы, але «прывабны».

— А наогул, пакуль мяне мала што з прапаноў прыцягвае. Ёсць жаданне вывучаць новыя тэхналогіі, а можа, і рэалізоўваць свае ўласныя праекты.

Калі вы таксама, як і Ганна, працуеце па графіку 4/3 або нейкаму свайму, раскажыце пра гэта ў каментарах.

dev.by, як і іншым сумленным медыя, сёння вельмі складана: рэдакцыя працуе па-за межамі краіны, а нашыя рэкламныя даходы скараціліся ў некалькі разоў. Але мы даем рады — з вашай дапамогай. Гэта вы дзеліцеся з намі інфанагодамі, думкамі, досведам, часам, увагай і данатамі.

Праз Patreon. 

З Беларусі — праз Donorbox.

І яшчэ крыптой, тут кашалькі.

Дзякуй, што прачыталі гэтае паведамленне.