VironIT дамогся забароны на выезд для экс-супрацоўніка. Праз 5К

Айцішнік цяпер жыве ў іншай краіне. Атрымаўшы позву ў суд, ён прыехаў у Беларусь, удзельнічаў у працэсе, але традыцыйна прайграў.

У сярэдзіне ліпеня суддзя Савецкага раёна Мінска Святлана Салапан вынесла пастанову аб спагнанні з экс-супрацоўніка выдаткаў на яго навучанне + адсоткаў + судовых выдаткаў. У суме 17,6 тыс. BYN. Адначасова суддзя адхіліла хадайніцтва ТАА «ВАСофт» аб тым, каб абмежаваць адказчыку выезд з краіны.

Сяргей з юрыстам запыталі матывіроўку, маючы намер падаць апеляцыю. Калі праз некалькі дзён ён паспрабаваў на аўтобусе перасекчы мяжу, выявілася, яго не выпусцілі.

— Я збіраўся з дачкой выехаць і працягваць вырашаць пытанні дыстанцыйна. Але на мяжы мяне адвялі ў асобны пакой і сказалі пра абмежаванне на выезд. Чаму, не сказалі. Цяпер мы вас пасадзім на зваротны аўтобус — едзьце ў Мінск, зайдзіце ў МУС — там вам растлумачаць. Толькі ў аддзеле міграцыі мне ўдалося высветліць, што выезд абмежаваў суд Савецкага раёна. Іду ў суд — выяўляецца, праз дзень пасля пасяджэння прадстаўнік «ВАСофт» данёс нейкі дакумент, і суддзя вынесла новае рашэнне, якое забараняе мне выезд. Матывіроўка: бо я магу з’ехаць.

Сяргей апратэставаў забарону на выезд, але гэта не дапамагло: не спрацавалі аргументы ні пра працу, ні пра цяжарную жонку за мяжой. Азнаёміўшыся з матывіровачнай часткай рашэння, айцішнік з юрыстам вырашылі, што шанцы на паспяховую апеляцыю мінімальныя. Довады аб нязгодзе са звальненнем па артыкуле суддзя адхіліла, бо звальненне не было своечасова аспрэчана.

— Усе мае аргументы тычацца Працоўнага кодэкса, тэрмін даўнасці па якім — тры месяцы, у той час як дамова з «ВАСофт» укладзеная згодна з Грамадзянскім кодэксам, па ім тэрмін даўнасці — тры гады, — кажа Сяргей Р. — Атрымліваецца, што аргументы, да якіх могуць апеляваць экс-супрацоўнікі VironIT, ужо страцілі сілу, а аргументы «ВАСофт» — не. Кампанія падае ў суд літаральна ў апошнія дні тэрміну іскавай даўнасці.

Апеляцыя чыста тэхнічна адтэрмінавала б набыццё рашэннем моцы і падоўжыла б забарону на выезд. А вяртанне да сям'і і працы было для Сяргея прыярытэтам. Таму ён заплаціў 17,6 тыс. BYN, дачакаўся зняцця абмежавання і выехаў.

Паводле слоў Сяргея, ён не апошні адказчык у такога роду ісках ад VironIT.

— У мяне ёсць калега, які сышоў з VironIT праз месяц-два пасля мяне. Нядаўна ў вайбер ён атрымаў прэтэнзію ад кампаніі: маўляў, вы павінны нам 5К. Уся гісторыя — як у мяне. Верагодна, ён таксама атрымае позву ў суд. І яшчэ адзін, незнаёмы, хлопец пасля публікацыі напісаў мне, што атрымаў такую ж прэтэнзію ў вайбер. У абодвух ад моманту звальнення прайшло амаль тры гады. То-бок нас ужо трое. У судзе ж прадстаўнік «ВАСофт» казаў, што разгледжана некалькі падобных іскаў (у лічбе я не ўпэўнены — здаецца, сем), і ўсе яны супрацоўнікамі прайграныя. Колькі такіх спраў усяго, можна толькі здагадвацца.

Нягледзячы на тое што Сяргей адмовіўся ад апеляцыі і заплаціў грошы, ён мае намер адстойваць свае правы далей. Раскажам, што з гэтага атрымаецца.

dev.by, як і іншым сумленным медыя, сёння вельмі складана: рэдакцыя працуе па-за межамі краіны, а нашыя рэкламныя даходы скараціліся ў некалькі разоў. Але мы даем рады — з вашай дапамогай. Гэта вы дзеліцеся з намі інфанагодамі, думкамі, досведам, часам і ўвагай. А 210 чытачоў падтрымліваюць нас данатамі.

У 2023 годзе мы хочам сабраць 1000 чытачоў-падпісчыкаў. 

Дапамагчы нам можна праз Patreon. 

З Беларусі — праз Donorbox.

І яшчэ крыптой, тут гаманцы.

Дзякуй, што прачыталі гэтае паведамленне.