У Wargaming упершыню 1000+, EPAM скараціўся. Як маюцца офісы ў Літве

Паводле даных rekvizitai.vz.lt, у Літве зарэгістравана каля 30 ІТ-кампаній з беларускімі каранямі. На гэты момант там працуе больш за 4,5 тысячы супрацоўнікаў. 

Скарацілі штат

EPAM

Каманда EPAM у Літве па-ранейшаму самая вялікая сярод кампаній з беларускімі каранямі. У двух офісах — Вільні і Коўне — зарэгістравана 1,5+ тысячы супрацоўнікаў. Аднак ад пачатку года агульная колькасць спецыялістаў скарацілася за кошт віленскага офіса. На дадзены момант тут зарэгістравана каля 1440 чалавек — на 50 менш, ніж у студзені. У той жа час каманда офіса ў Коўне вырасла на 50% — ад 60 да 90+ супрацоўнікаў.

Мяркуючы з адкрытых вакансій, EPAM не пакідае планаў павялічыць каманду ў Літве. На сайце кампаніі размешчана 130 прапаноў для працы ў літоўскім офісе — амаль у 2 разы больш, ніж для працы, у прыватнасці, у Польшчы.

Softeq Development

У літоўскім офісе кампаніі зарэгістравана 138 супрацоўнікаў — на 8 менш, ніж на пачатку года. Штат нязначна скараціўся ў сакавіку-красавіку.

Раней СЕО Softeq Development Крыс Ховард напісаў ліст супрацоўнікам і паведаміў пра звальненне 60 чалавек «у рамках стратэгічнай рэарганізацыі». Некалькі супрацоўнікаў кампаніі расказалі dev.by, што скароцяць у асноўным спецыялістаў на бэнчы (уключна з частковым), некаторых спецыялістаў «з высокім заробкам», а таксама супрацоўнікаў-ІП, якія працавалі па праграме Work From Anywhere — у прыватнасці, у Польшчы. Што праўда, паводле слоў суразмоўцаў, віленскі офіс кампаніі звальненні закрануць у меншай ступені.

Melsoft

Распрацоўшчык гульняў Melsoft таксама скараціў каманду ў Вільні на 8 чалавек. На дадзены момант у офісе зарэгістравана 311 спецыялістаў. Між тым усе прапановы аб працаўладкаванні на сайце кампаніі тычацца працы ў Літве. 

Flo Health

Каманда распрацоўшчыка праграмы для жаночага здароўя скарацілася ад пачатку года на 5,5% — ад 245 да 232 супрацоўнікаў. Зрэшты, кампанія працягвае шукаць супрацоўнікаў для працы ў Літве. На сайце кампаніі адкрыта больш за 10 такіх вакансій.

Cortlex 

Кампанія амаль цалкам скараціла штат офіса ў Вільні. На дадзены момант тут зарэгістраваныя 4 супрацоўнікі (19 было на пачатку года).

Як растлумачылі ў Cortlex, гэта звязана з тым, што «на гэты момант кампанія адкрывае новую юрыдычную асобу ў Літве ў сувязі з унутранай рэструктурызацыяй».

Таксама ад пачатку года нязначна скарацілі літоўскія каманды Exadel, Coherent Solutions. 

Павялічылі штат

Wargaming

Літоўскі офіс Wargaming — другі паводле колькасці сярод ІТ-кампаній з беларускімі каранямі. Днямі штат упершыню пераадолеў планку ў 1000 зарэгістраваных спецыялістаў. Ад пачатку года каманда вырасла на 10+ супрацоўнікаў.

На сайце кампаніі адкрыта больш як 200 вакансій, з іх каля 40, або 15% ад агульнай колькасці, — для працы ў Літве. Сярод усіх лакацый Літва паводле колькасці прапаноў працы саступае толькі Сербіі (60+ вакансій).

Gurtam

Ад пачатку года штат літоўскага офіса вырас амаль на чвэрць. На дадзены момант тут зарэгістравана 170 супрацоўнікаў.

Не выключана, што літоўская каманда вырасла ў асноўным за кошт рэлакантаў з Беларусі. У Мінску быў асноўны офіс распрацоўкі Gurtam. Тут працавала 200+ супрацоўнікаў. Але кампанія прыняла рашэнне сысці з Беларусі. Афіцыйна працэдура ліквідацыі беларускай юрыдычнай асобы Gurtam пачалася ў лютым гэтага года. Датуль (у снежні 2022) кампанія ліквідавала расійскую юрыдычную асобу.

iTechArt

У літоўскім офісе iTechArt на дадзены момант зарэгістраваны 181 супрацоўнік — на 10 больш, ніж у студзені. Аднак у гэтым месяцы прыкладна на столькі ж чалавек каманда скарацілася. Паводле даных rekvizitai.vz.lt, пры канцы сакавіка ў штаце было 189 супрацоўнікаў.

Не выключана, што штат скароціцца яшчэ больш. iTechArt сутыкнулася з крызісам, пра што расказаў у нядаўнім лісце супрацоўнікам CEO Сяргей Каваленка. З гэтай нагоды кампанія ў другім квартале замарозіць найманне, частцы супрацоўнікаў «дазволяць сысці/не будуць утрымліваць». Змены закрануць усе падраздзяленні iTechArt.

Godel Technologies

У камандзе літоўскага офіса Godel упершыню больш за 100 зарэгістраваных супрацоўнікаў. Але, паводле інфармацыі dev.by, кампанія мае праблемы з пошукам новых праектаў. У якасці антыкрызіснай меры кампанія скарачае супрацоўнікаў на бэнчы.

Таксама ад пачатку года вырасла колькасць супрацоўнікаў у літоўскім офісе LeverX Lithuania, Itransition, Belka Games, IBA, SaM Solutions, Yukon Advanced Optics Worldwide.

Вы можаце падтрымаць dev.by рознымі спосабамі, напрыклад, хуткім данатам проста цяпер.