У Расіі стала не хапаць джуноў?

На працягу 2022 года на рынку было адкрыта больш за 67 тысяч вакансій для ІТ-спецыялістаў без досведу працы (джуноў) і каля 310 тысяч — для супрацоўнікаў з досведам працы ад 1 да 3 гадоў. Пры гэтым агульная колькасць суіскальнікаў у гэтых катэгорыях складае 214 тысяч чалавек.

Апытаныя даследчыкамі прадстаўнікі энергетычнага і фінансавага сектараў кажуць, што ў іх колькасць вакансій для джуноў засталася на ўзроўні 2021 года. Сярод прамысловых прадпрыемстваў і ІТ-кампаній спецыялісты пачатковага ўзроўню патрэбныя: у сярэднім колькасць вакансій у гэтай катэгорыі павялічылася на 25%.

Дэфіцыт кадраў вымусіў расійскія кампаніі змяніць агульны падыход да наймання, адзначаюць у HeadHunter. Амаль траціна рэспандэнтаў стала прыцягваць спецыялістаў на часовай аснове, яшчэ траціна — лаяльней ставіцца да аддаленай працы. Чвэрць прадстаўнікоў малога бізнэсу адказалі, што актыўна працаўладкоўваюць студэнтаў. Абсалютная большасць працадаўцаў (72%) сталі актыўней разглядаць на адкрытыя пазіцыі кандыдатаў, якія прайшлі перакваліфікацыю.

«Многія нашыя кліенты і партнёры сапраўды пачалі актыўней наймаць junior-спецыялістаў, паколькі ім неабходна папоўніць дэфіцыт кадраў праз сыход middle- і senior-спецыялістаў, якія з’ехалі за мяжу», — адзначыў дырэктар цэнтра падбору ІТ-спецыялістаў SymbioWay Данііл Піліпенка. Ён дадаў, што кампаніі ахвотней, ніж раней, навучаюць недасведчаных супрацоўнікаў унутры арганізацыі.

Самі ж удзельнікі рынку запэўніваюць, што пакуль у прыярытэце ўсё ж спецыялісты высокага і сярэдняга ўзроўню. Але крыніцы выдання на рынку пацвярджаюць, што кампаніі ўсё часцей наймаюць джуноў, асабліва калі падціскаюць тэрміны дзяржкантрактаў.