Оўпэнсорсныя распрацоўшчыкі моляць багхантараў не пісаць справаздач праз генератыўны АІ

Пытанне нядаўна падняў у сваім блогу распрацоўшчык Python Software Foundation Сэт Ларсан. Ён паскардзіўся на наплыў у оўпэнсорсных праектах «вельмі нізкаякасных, смеццевых справаздач па бяспецы, створаных галюцынуючымі вялікімі моўнымі мадэлямі». Гэтыя справаздачы выглядаюць праўдападобна, а на іх выкрыццё даводзіцца марнаваць час. Рэч у тым, што часцяком уразлівасцяў, апісаных у такіх справаздачах, насамрэч не існуе. Ларсан прапаноўвае класіфікаваць падобныя справаздачы як шкодныя.

Аб праблеме яшчэ на самым пачатку студзеня згадваў аўтар праекта curl Даніэль Стэнберг. Прайшоў амаль год, але, паводле яго слоў, ён па-ранейшаму «рэгулярна і ў вялікіх аб’ёмах» атрымлівае «памыйныя АІ-справаздачы» ад адрасантаў, якія часткова або цалкам аўтаматызаваныя. Стэнберг кажа, што рашуча настроены змагацца з гэтым.

У оўпэнсорсе такія справаздачы асабліва непажаданыя, бо мейнтэйнеры ў большасці выпадкаў займаюцца падтрымкай праектаў на добраахвотнай аснове ў вольны час.

Ларсан кажа, што пакуль такіх справаздач паступае адносна няшмат — менш за дзесяць на месяц, але і гэта вельмі непрыемна і дае падставу для турбот. Ён лічыць, што ў далейшым іх стане больш і яны напоўняць яшчэ больш праектаў. Гэта можа прывесці да выгарання мейнтэйнераў і прымусіць іх кінуць займацца бяспекай у оўпэнсорсе. Супольнасць мае дзейнічаць праактыўна і паспрабаваць знізіць патэнцыйную шкоду. Таксама адное з рашэнняў бачыцца яму ў аплаце працы мейнтэйнераў, што дазволіць уцягнуць у сферу больш людзей.

Ларсан заклікаў багхантараў не дасылаць справаздач, не правераных чалавекам, і не карыстацца генератыўным АІ, бо на сённяшні дзень гэтыя інструменты «не разумеюць кода». А платформы, якія прымаюць справаздачы ад багхантараў, ён просіць прыняць меры па абмежаванні стварэння аўтаматызаваных і смеццевых справаздач.