Як шукаць працу на працы і не спаліцца. Парады ад айцішнікаў
Хадзіць час ад часу на сумоўі, нават калі ты не збіраешся мяняць працу, — нармальна, лічыць шмат хто з айцішнікаў (хоць не ўсе эйчары з імі пагодзяцца). Але ці лёгка шукаць працу на працы і не спаліцца?
Задалі гэтае пытанне чытачам і сабралі некалькі шкодных парад з асабістага досведу (імёны спікераў змененыя).
Трое чытачоў напісалі нам, што яны заўжды праходзілі анлайн-сумоўі прама ў офісе свайго тадышняга працадаўцы — проста рэзервавалі перамоўны пакой.
— Спачатку мне было трохі страшна, але потым я ўсвядоміў: каб зразумець, што адбываецца за дзвярыма, — трэба стаяць і слухаць. А гэта магчыма, толькі калі за табой хтосьці мэтанакіравана сочыць.
Плюс у аўтсорсе праходзіць дадатковыя гутаркі на праекты заказчыка — нармальная практыка. І каб спаліць, трэба вельмі пастарацца, — расказвае цімлід Андрэй.
iOS-распрацоўшчык Сяргей (сеньёр) падзяліўся парадай: «У мітынг-руме сядаеш насупраць дзвярэй. Калі хтосьці заходзіць, то бачыць цябе ў слухаўках, і ты вельмі заняты — ён выходзіць». А наконт саміх гутарак з рэкруцёрамі можна дамаўляцца па тэлефоне на дварэ — так ніхто з калег гэтай размовы не пачуе.
Відавочна, аддаленая праца вельмі спрашчае гэтую механіку.
«Памыліўся з датамі — прыйшлося 3 месяцы працаваць на дзве кампаніі»
— Заўжды шукаў новую працу, пакуль яшчэ працаваў на старой. На гутаркі «хадзіў» прама ў працоўны час — аддалена. Проста рэзерваваў загадзя пакоі для перамоў — і ўсё. У нас у кампаніі было строгае правіла: калі перамоўны пакой заняты — ён заняты. А эйчары, з якімі ў мяне было сумоўе, ані разу не спыталі, дзе гэта я знаходжуся. Іх больш цікавілі мае навыкі, а не месца.
І, тым не менш, аднойчы я памыліўся з датамі звальнення і наймання — і прыйшлося 3 месяцы працаваць на дзве кампаніі, якія супернічалі. Было страшна! Але пашанцавала, што ў абедзвюх была аддаленая праца, плюс другая кампанія не патрабавала даць працоўную для афармлення, інакш было б складана.
Я быў лідам і там, і там, але ў працоўным часе быў рассінхрон: кампанія А прасіла з’яўляцца анлайн да 11:00 раніцы, а кампанія Б — да 13:00 максімум. Улічваючы, што каманда ў кампаніі А прачыналася рана, а ў кампаніі Б карысталася правілам «да 13:00», у мяне заўжды было да 4 гадзін паўнавартаснага працоўнага часу ў кампаніі А. Сустрэчамі, вядома, даводзілася жангляваць, але Focus Time у календары выратоўваў, — расказаў сваю гісторыю цімлід Пятро.
QA-інжынер Анатоль паведамляе, што яго рэзюмэ наогул увесь час вісіць на джаббордах, і яму час ад часу пішуць эйчары іншых кампаній.
— Не бачу ў гэтым нічога такога, нават калі пра гэта даведаюцца ў маёй канторы. Трэба ж разумець, чаго ты варты на рынку.
Памятка з асабістага досведу
А вось парады ад Алеся, Java-распрацоўшчыка ўзроўню Senior:
- Не чапаем LinkedIn — па ім эйчар цяперашняй кампаніі лёгка вызначыць, што вы ў актыўным пошуку.
- На джаббордах дадаем цяперашнюю кампанію ў чорны спіс — і шукаем працу. Убачыць твар HR-дырэктара, які здзівіцца: як гэта яны не заўважылі, — варта таго.
- Я спрабаваў прайсці сумоўе падчас працы — гэта было адзін раз, я проста выйшаў нібыта на абед/перапынак (балазе ніхто не маніторыў). Але гэта быў эксперымент. Другі раз на такое не адважыўся б.
- І спрабаваў сумоўе пасля працы. З майго досведу, гэта самы нязручны варыянт — ні для таго, хто праходзіць інтэрв’ю, ні для таго, хто яго праводзіць. Для джуна можа і ок (я і сам практыкаваў такое, калі быў джуном), але на вышэйшых узроўнях і так галава пасля працы «кіпіць».
- Самы аптымальны варыянт, да якога я прыйшоў, — бярэш адпачынак/за свой кошт на тыдзень або два і праходзіш па 2 сумоўі на дзень (можна па 3, але па нагрузцы цяжэй).
- Пажадана выкласці анкету за 1-2 рабочыя дні да адпачынку — так ты паспееш сфармаваць пул інтэрв’ю. Я так не зрабіў, і прыйшлося прызначаць сумоўі ледзь не дзень у дзень. У выніку ўсё прайшло выдатна: за тыдзень — 10+ сумоўяў, і нават адное ў суботу.
- Дарэчы, такая колькасць інтэрв’ю дапамагла падняць заробак вышэй за чаканні — я змог зрабіць 2,5х замест 2х, як планаваў першапачаткова. Ну і рэкамендую спачатку ісці на сумоўе туды, дзе ты наўрад ці стаў бы працаваць, — не толькі дзеля самой практыкі гутарак, але і адмоў ад офераў. Гэта таксама важна.
Читать на dev.by