Што б такога пачытаць, паглядзець, паслухаць, паклiкаць на роднай мове

dev.by папрасіў беларускамоўных айцішнікаў з EPAM, SOFTSWISS, billwerk і PST Labs — герояў нашых папярэдніх матэрыялаў пра сумоўі і працоўную камунікацыю — падзяліцца сваімі беларускамоўнымі знаходкамі.

Атрымалі вялізны спіс — ад падкастаў ды гістарычных тэлеграм-каналаў да беларускамоўных стыкераў і музычных гуртоў. Падзялілі па тэмах і публікуем, недзе пакінуўшы каментары аўтараў.

Стыкерпакі з Іланам Маскам ды беларускай лаянкай

Беларускамоўных стыкерпакаў у тэлеграме даволі багата.

• Стыкерпак да дня беларускай мовы з бульбай-сэрцам і дыназаўрам «каб не ўмёрлі» з адсылкай да Багушэвіча.
• Зараз не час, але ўжо праз 10 месяцаў спатрэбяцца калядныя стыкеры.
• Шкардзь мардалысая! Блямба! Халера! — гэта ўсё беларуская лаянка.

• Ёсць беларускамоўны Ілан Маск. (Стыкерпак ад «Маланкi», гэта сетка электра­зарадных станцый Беларусі. — dev.by)
• I такі ж самы кот.

Анлайн-сустрэчы з беларускамоўнымі і якасныя слоўнікі

СуперМова, Лёгкая мова, Мода на мову

Усе гэтыя каналы дапамогуць у вывучэнні беларускай мовы. Як размаўляць па-беларуску, палепшыць слоўнікавы запас, даведацца значэнне фразеалагізмаў. І не рабіць вялікія вочы, калі бачыш незнаёмае слова. Гэта адзін з фразеалагізмаў, які тлумачылі ў каналах нядаўна. Які значыць «здзіўляцца». Дарэчы, тут жа публікуецца афіша беларускамоўных анлайнавых ды афлайнавых падзей.  

❓Якое вашае саме любімае слова на роднай мове? Дзяліцеся ў каментарыях! 

Вольная мова 

Гэта суполка для тых, хто стаміўся вывучаць мову пасіўна і жадае размаўляць. Гэта платформа па арганізацыі анлайн-сустрэч для людзей, дзе па-беларуску абмяркоўваюць абсалютна розныя тэмы. 

Слоўнік Скарнік

«Ім карыстаюся найчасцей, не заўсёды безальтэрнатыўна, але вельмі зручна» 

Слоўнік Слоўнік 

«Для больш дасканалай інфармацыі, калі трэба прагледзець варыянты, разабрацца з шматсэнсоўнасьцю ці знайсці якое слова, таксама зручна, але трэ паболей разьбірацца, таму ён на другім месцы». 

Беларуская Вікіпедыя 

«У Вікіпедыі стараюся чытаць артыкулы на беларускай (наркамаўка і тарашкевіца), асабліва па Беларусі. Па іншых тэматыках, на жаль, беларускія артыкулы часцяком саступаюць змястоўна версіям на іншых мовах: перадусім, на рускай і ангельскай».

Падарожжы, гісторыя, фотаархіў

Куфар старажытнасцяў

Праект супрацоўніка музея Купалы Паўла Каралёва пра цікавыя гістарычныя знаходкі. Павал некалькі гадоў збірае ў Мінску рэшткі посуду, будаўнічых матэрыялаў, упрыгожванняў, па якіх аднаўляе гісторыю. Ён цікава распавядае не толькі пра свае знаходкі, але і пра тыя, якія былі зроблены яшчэ да яго нараджэння. Напрыклад, у 60-я гады каля дома Купалы быў знойдзены кубак для кавы. Калі яго паказалі ўдаве пісьменніка Уладзіславе Луцэвіч, тая расплакалася, бо прыгадала гэты посуд з пісьменніцкага дома.

Veha.by

Фотаархіў, у стварэнні якога прынялі ўдзел больш за 650 чалавек і некалькі калекцыянераў. Тут сабраныя здымкі простых беларусаў, па якіх можна адсачыць гісторыю. 

— Прыняць удзел у стварэнні гэтага сацыяльнага архіва можа кожны. Мы збіраем толькі адсканаваныя фотаздымкі — арыгіналы захоўваюцца ў вашай сям'і. Далей, апісваем кожны здымак, каталагізуем, праводзім рэтуш і публікуем у нашым онлайн архіве, — пішуць аўтары праекта. —  Вы можаце знайсці ў архіве VEHA фатаграфіі сваякоў — хоць гэтыя фота даслалі нам іншыя людзі ці музеі. Калі гэта так — напішыце нам, мы падзелімся з кантактамі адпраўнікоў і калі трэба даладзім апісанне. 

Sacral_BY

Тэлеграм-канал пра турызм па Беларусі. Тут публікуюцца аповеды пра падарожжы і гістарычныя звесткі пра беларускія мясціны і дзеячоў, з імі звязаных.

Канал пісьменьніка Кірыла Стаселькі

Гэта зусім невялічкі канал з нячастымі абнаўленнямі. Сучасны аўтар Кірыл Стаселька публікуе там свае гісторыі.  Напрыклад, вось: 

«Трошкі пра аналогіі. Калі суп з курыцы ці іншая страва з курыным мясам з’явіліся ў выніку смерці некалі жывой курыцы, у дзяцінстве мне падавалася, што гэткая ж логіка распаўсюджваецца і на іншыя прадукты. Менавіта таму я доўга дабіваўся ў цёткі, якая купіла пончыкі, якую жывёлу прыйшлося забіць, каб атрымалася гэтая смачная рэч».

wir.by

Лекцыі навукоўцаў, відэа, артыкулы, гульні і падкасты пра беларускую культуру. Тут не так часта выходзіць нешта новае, але ўсе матэрыялы знаходзяцца нібы па-за часам і застаюцца актуальнымі.

— З гэтым праектам і яго камандай я звязаны, таму можаце сумнявацца ў маёй аб’ектыўнасці, — кажа герой, які параіў дадаць сайт у спіс. Але ж ад сябе дадаем, што праект сапраўды класны. 

— Беларуская культура нярэдка ўспрымаецца ізалявана ад сусветнага і еўрапейскага кантэксту. Мы хочам гэта змяніць, — тлумачаць аўтары праекта. 

Набываем кнігі, слухаем падкасты пра літаратуру

Выдавецтва Янушкевіч 

«Набываю тут кнігі». 

Беларуская палічка 

Электронная бібліятэка беларускай літаратуры. Тут можна знайсці нямала беларускамоўных кніг. А таксама бібліятэку можна пашырыць, даслаўшы сваю кнігу.

Bellit 

Падкаст пра сучасную літаратуру, беларускую і сусветную філолага і прадавачкі кнігарні Насты Карнацкай.

Беларускамоўны тэлеграм і мапы Organic Maps

«У тэлефоне я па змоўчанні стараюся абраць беларускую мову ў кожным дадатку, дзе гэта магчыма. Не кажучы ўжо пра сістэмныя налады самога тэлефона: напрыклад, дата на застаўцы экрана. Я карыстаюся поштай, сацыяльнымі сеткамі і месенджарамі — і ў кожным намагаюся ўжываць беларускую менавіта ў інтэрфейсе. Канкрэтна: Telegram, Viber, WhattsApp, Skype, Zoom, Signal, Google Mail, Yandex Mail, Yahoo, Instagram, Twitter, Facebook, VK.

Асобна вылучу навігатар Organic Maps ад айчынных распрацоўшчыкаў».

Музыка 

Тут проста сабралі гурты і музыкаў, якіх параілі нашы героі.

Няміга-гурт, Akute, Аляксандр Памідораў, Бяз Назвы, Palina, Lear, Лявон Вольскі, Зміцер Вайцюшкевіч, ДайДарогу, Naka, Мутнаевока, NizKiz, NaviBand, Маргарыта Ляўчук, J:Морс, Pylai, Relikt, Intelligency.

Фільмы і серыялы

Фестываль кіно «Паўночнае ззянне» 

«Любімы беларускі кінафестываль. Паказваюць фільмы з беларускімі субтытрамі (а часам і з беларускай агучкай), усе мерапрыемствы праводзяць па-беларуску. Апошнія два гады адбываецца ў анлайн-фармаце».

КінаКіпа і kykymba.com

Фільмы, серыялы і мультфільмы па-беларуску.

Беларуская манга і анімэ

— Мы дзейнічаем у трох напрамках: пераклаем мангу, ствараем разважальны кантэнт, агучваем і робім субтытры для анімэ. Мы пачалі перакладаць у 2017 годзе і з таго часу выпусцілі па-беларуску дзясяткі тайтлаў мангі і анімэ, — распавядаюць аўтары. — Сёння ў камандзе больш за 50 прафесіяналаў: перакладчыкаў, дабераў, рэдактараў, маркетолагаў. Гэтыя цудоўныя людзі вельмі розныя ў жыцці: настаўнікі і студэнты, бармэны і інжынеры, музыканты і фрылансеры. Усе рознага ўзросту і поглядаў на жыццё; але аб’яднаныя агульнымі каштоўнасцямі — узаемапавагай, апантанасцю мовай і анімэ, любоўю да сваёй краіны.

А яшчэ… 

«Ну і дарэчы, лепшая беларускамоўная кавярня ў Мінску — гэта «Апостраф на Алібегава, 28. Там беларускамоўныя барысты, літаратура і усё астатнее». 

Дадавайце цiкавосткi ў каментах!

«Офер — толькі калі перайду на рускую мову». Беларускамоўныя айцішнікі пра сумоўі 

По теме

«Офер — толькі калі перайду на рускую мову». Беларускамоўныя айцішнікі пра сумоўі 

«Не магу ўявіць мітынг па-беларуску». Айцішнікі пра мову ў працоўных камунікацыях 

По теме

«Не магу ўявіць мітынг па-беларуску». Айцішнікі пра мову ў працоўных камунікацыях 

«Шмат людзей сышло ў софт, iнжынераў рэальна не хапае». Дзяўчына-хардвершчыца аб тым, як рэалiзавацца ў мужчынскай быццам бы прафесii

По теме

«Шмат людзей сышло ў софт, iнжынераў рэальна не хапае». Дзяўчына-хардвершчыца аб тым, як рэалiзавацца ў мужчынскай быццам бы прафесii

devby 17 лет!

Вспоминаем наш (и ваш) переходный возраст и делимся виш-листом