ИТ-хандра

У Мінску могуць закрыць офіс паўднёвакарэйскай SK Hynix (топ-3 сусветных вытворцаў паўправаднікоў, топ-5 вытворцаў аператыўнай памяці). Праца кампаніі абмежаваная праз санкцыі, каманду рэлакуюць у Польшчу. Тых, хто адмовіцца ад пераезду, могуць звольніць. Пра гэта dev.by на ўмовах ананімнасці расказалі некалькі супрацоўнікаў SK hynix memory solutions Eastern Europe (да 2018 года — Softeq Flash Solutions). Кампанія не каментуе.

PM Зміцер Брыцько (досвед у ІТ — амаль 2 гады) падзяліўся ў лінкедзіне навіной: праз 3 месяцы пошукаў працы ў Беларусі ў яго, нарэшце, з’явіўся першы водгук — яго запрасілі… на пазіцыю прыбіральшчыка. Даведаліся, як так. А заадно абмеркавалі сітуацыю з прафесійным хэдхантарам і кар’ерным кансультантам. Ён у тым ліку ацаніў трэнд — чаму ў LinkedIn усё больш пастоў накшталт «Я UX/UI-дызайнер, але шукаю працу на шынамантажцы».

EffectiveSoft звольніла больш за 20 чалавек у мінскім і польскім офісах. Акрамя таго, ад лістапада супрацоўнікам без камерцыйных праектаў (альбо з унутранымі праектамі, альбо на бэнчы) зрэзалі стаўку са 100% да 80%. Пра гэта dev.by расказаў адзін з супрацоўнікаў кампаніі. Топ-менеджмент EffectiveSoft патлумачыў камандзе, што такія рашэнні выкліканыя «бягучай сітуацыяй».

У цэлым па рынку ІТ-вакансіі стагнуюць, а ў ПВТ працягваюць зніжацца.

Скарачэнні, замарозка, бэнч — ці гэта ўсё насур’ёз і надоўга? Спыталіся экспертаў.