«ІТ на служэнне Богу». У Наваградку прайшоў хрысціянскі хакатон — распавядаем, як гэта было

Хто піша: ксёндз Яўген Шымановіч, су-арганізатар праекту IT FOR CHRIST, у мінулым — C# распрацоўшчык.  

Хто зрабіў хакатон

Ідэя развіваць хрысціянскую супольнасць айцішнікаў была ў мяне і майго сябра, сістэмнага архітэктара, Андрэя Місана, даўно. З Андрэем мы сябруем са школьных часоў. Студэнтамі зрабілі праект imsha.by — вэб-прыладу з актуальным раскладам набажэнстваў у касцёлах Беларусі. 

У нас быў добры досвед у IT і жаданне накіраваць яго на служэнне Богу. Восенню 2023 года мы вырашылі паспрабаваць зрабіць канферэнцыю, каб сабраць людзей, якім была б цікавая і блізкая наша ідэя. Тады да нас далучылася  продакт-менэджар Даша Шур. Так і сабралася наша каманда з трох чалавек, пасля яшчэ далучыліся валанцёры. 

Спачатку мы зрабілі першую хрысціянскую ІТ-канферэнцыю. Сабралі ажно 70 чалавек! Канферэнцыя была тэарэтычным мерапрыемствам, хацелася больш практыкі і нетворкінга. Так прыдумалі канцэпцыю кэмпа — пляцоўкі для запуску і акселерацыі хрысціянскіх IT праектаў. Так прыйшлі да хакатону.

Шукалі хрысціянскае і цікавае гістарычнае месца

Мы шукалі месца, зручнае для хрысціянскіх мерапрыемстваў, дзе ёсць магчымасць пераначаваць і добрыя ўмовы. Дом пры парафіі святога Арханёла Міхала ў Навагрудку — адзін з найлепшых варыянтаў. Да таго ж, ідэя правесці выходныя за горадам у цікавым гістарычным месцы добра ўпісвалася ў нашу канцэпцыю. 

Кэмп пачаўся са знаёмства і начной экскурсіі па касцёле святога Арханёла Міхала. Падчас хакатону мы працавалі 24/7, атрымалася таксама зрабіць начное малітоўнае чуванне перад Найсвяцейшым Сакрамэнтам. У перарывах каманды гулялі па пагоркам Навагрудка, а пасля хакатону і афтер-паці частка ўдзельнікаў са святарамі паехалі назіраць паўночнае ззянне.

Мы назвалі хакатон CODE-PRAY-JOY і хацелі стварыць сяброўскую атмасферу кэмпа. Месца таксама дапамагло.

Якія ёсць хрысціянскія апплікацыі?

Мы ў IT FOR CHRIST нават рабілі падборку прыкладанняў, якія дапамогуць у духоўным росце: 

1. YouVersion — аплікацыя, якая дапаможа вывучыць Біблію. Вылучаецца добрым інтэрфейсам. 
2. Bible X Games — відэагульня, якая прапаноўвае новы спосаб вывучэння Бібліі. 
3. Hallow — одное з найбольш папулярных каталіцкіх прыкладанняў для малітв і медытацыі. 
4. Tweeting with God — мабільная аплікацыя, якая дазваляе камунікаваць з Богам як з сябрам у сацыяльнай сетцы. 
5. Angel Studios — дармовы стрымінгавы сэрвіс, дзе можна паглядзець хрысціянскія фільмы для любога веку. 

Нам удалося сабраць 42 чалавекі (не толькі з Беларусі!) 

Мы шукалі айцішнікаў у шырокім сэнсе. Людзей, якім цікава распрацоўваць хрысціянскія праекты. Менавіта: новая евангелізацыя (абнаўленне хрысціянства і імкненне данесці хрысціянскія ісціны і каштоўнасці на сучаснай зразумелай мове), праекты для ўнутраных працэсаў у касцёле/царкве і сацыяльныя праекты.

Хакатон адбываўся з вечара пятніцы па нядзелю. Удзельнікі працавалі над праектамі, слухалі выступы ад спікераў і атрымоўвалі фідбэк ад ментараў. Адна з каманд нават паспела зрабіць кастдэв. Каманда распрацавала андроід-прыладу і прапаноўвала дзецям і іх бацькам пасля нядзельнай імшы пратэставаць гульню і падзяліцца водгукам.

На хакатон прыехалі людзі з розных куткоў Беларусі, і нават з Масквы і Тбілісі. Яны мелі розны досвед веры, належалі да розных канфесіяў. Але разам стварылі гарманічную, добрую і сяброўскую атмасферу. Гэта ўразіла мяне як арганізатара, айцішніка і хрысціяніна. Было відаць, як людзі з рознымі поглядамі могуць аб’ядноўвацца дзеля агульнай добрай мэты.

Мы шукалі як дасведчаных айцішнікаў, так і пачаткоўцаў, галоўным для нас была матывацыя ўдзельнікаў, каб яны падзялялі нашы каштоўнасці і мэты. Мы планавалі сабраць хаця б 6 каманд, бо для першага разу складана ментарыць і дапамагаць вялікай колькасці ўдзельнікаў. У выніку атрымалася 9 каманд.

Перамагла Andoid-прылада для ўзмацнення ведаў па катэхізісе каталіцкага касцёла 

У нядзелю была прэзентацыя праектаў у фармаце прэзентацыі (5 хвілін на пітч). Каманды прадставілі прататыпы. Мы былі прыемна ўражаны вынікамі. Хрысціянства і тэхналогіі спалучыліся ў разнастайных праектах з выкарыстаннем ML-тэхналогій, інтэрфейсаў (веб, мабілка, чат-бот) і нават аўтарскіх методык для стварэння кантэнту (адзін з удзельнікаў Юрый стварыў ужо больш за 2 тысячы біблейскіх загадак).

Было 3 прызы: прыз удзельнікаў-гледачоў праз галасаванне, прыз па выбару арганізатараў і прыз пераможцаў хакатона, які вызначала журы. Прызы мелі хутчэй сімвалічны характар — невялікія інвестыцыі ў каманды, якія мы сабралі праз дабравольныя ахвяраванні. 

• Пераможцам хакатона стаў Android-дадатак «Хто хоча на Неба?». Гэта вiктарына для замацавання ведаў па катэхiзiсу каталiцкага касцёла, дзе можна адказваць на пытанні і пераходзіць на розныя ўзроўні, браць падказку званок сябру ці параіцца з штучным інтэлектам.
• Прыз арганізатараў атрымаў чат-бот «Christian Compass», пабудаваны на аснове open-source LLM-мадэлі, якая «паглядзеўшы» аўтарытэтныя хрысціянскія YouTube каналы, дапамагае хутка знайсці адказы на пытанні хрысціянскай веры.
• Прыз удзельнікаў-гледачоў атрымалі вэб-прыкладанне «Бог на сувязі» — духоўна-псіхалагічная дапамога. Яно выкарыстоўвае дысталяваную мадэль глыбокага навучання Rubert-tiny2 для семантычнага пошуку вершаў з Евангелля, а таксама вэб-прыкладанне з элементамі гейміфікацыі «PrоВibli» для вывучэння Бібліі праз загадкі.

Спадзяемся, што ўдзельнікі будуць працягваць працаваць над праектамі і хутка свет пабачыць выхад у прод новага прадукту.

Гэта быў добры старт і плануем працягваць развіваць паект ІТ FOR CHRIST. Наша бачанне — гэта супольнасць хрысціянаў, якія дзеляцца досведам у сферы інфармацыйных тэхналогіяў, сябруюць і служаць разам у евангелізацыйных праектах.

Мы шчыра дзякуем усім, хто дапамог зрабіць нам першыя крокі і запрашаем далучыцца. Пакуль адпачываем, а восенню плануем чарговую канферэнцыю ў Мінску. Будзем рады як удзельнікам, так і спікерам, спонсарам, валанцёрам. Калі гэта вы, то сачыце і далучайцеся да сацсетак (Telegram і Instagram). 

Меркаванні аўтараў могуць не адлюстроўваць пазіцыю рэдакцыі. 

Што яшчэ прачытаць пра ІТ у Беларусі? 

• Што цяпер «баліць» проджэктам у Беларусі? 
• «Заробкі ўпалі на 10-15% паводле адчуванняў». HR-менеджер распавядае, як шукаў працу ў Беларусі;
• «Усе, хто хацелі, ужо з’ехалі». QA з Гомеля пра заробкі, палітыку і расейскіх замоўцаў.  

🎊 Dzik Pic Store открыт и готов принимать заказы!

Заходи к нам в магазин