Якія вядомыя прадуктавікі сышлі, хто застаўся і як гэта мяняе рынак

Адзін з найбуйнейшых сусветных выдаўцоў і распрацоўшчыкаў на рынку free-to-play MMO. Флагманскія праекты — World Of Tanks і World of Warships. Аўдыторыя — 200 + мільёнаў карыстальнікаў.  

На пачатку красавіка 2022 года Wargaming заявіў аб закрыцці бізнесу ў Беларусі і Расіі і перадачы яго ў лакальнае кіраванне расійскай Lesta Studio. На пачатку верасня «Гейм Стрым» (былая юрыдычная асоба Wargaming у Беларусі) перайшла ў поўную ўласнасць да расійскага ТАА «Леста».

У «Гейм Стрым» працавала больш за 2 тысячы супрацоўнікаў. Каманда мінскага офіса «Лесты» меншая ў 4 разы — 500+ чалавек. Офісныя плошчы за два гады скараціліся на 2/3.

Wargaming у 2022 годзе адкрыў новыя офісы ў Бялградзе і Варшаве (усяго ў кампаніі адкрытыя офісы ў 10+ краінах). Літоўскі офіс Wargaming уваходзіць у топ-3 ІТ-кампаній паводле выплачаных падаткаў і ў топ-3 паводле колькасці супрацоўнікаў сярод кампаній з беларускімі каранямі ў Літве (штат каля 990 чалавек). 

Выдае софт для аўтаматызацыі дакументаабароту. Утвораная ў 2011 годзе. Заснавальнікі — Мікіта Мікада і Сяргей Барысюк.

У 2020 і 2021 гадах PandaDoc уваходзіла ў лік найлепшых працадаўцаў ЗША сярод стартапаў па версіі Forbes. Таксама кампанія з’яўляецца адной з самых хуткарослых у ЗША. Увосень 2021 года PandaDoc прыцягнуў інвестыцыі і стаў аднарогам.

За год да гэтага Мікіта Мікада і Сяргей Барысюк ініцыявалі стварэнне прыватнай ініцыятывы па зборы грошай для беларускіх сілавікоў, якія вырашылі змяніць прафесію пасля падзей жніўня 2020. 

У верасні 2020 года ў офісе кампаніі прайшлі ператрусы. Чатыры супрацоўнікі PandaDoc апынуліся ў СІЗА, іх абвінавацілі ў махлярстве. Пазней траім з іх змянілі меру стрымання і выпусцілі з СІЗА. Даўжэй за ўсіх у няволі ўтрымліваўся менеджар па прадукце Віктар Куўшынаў. Ён выйшаў на волю толькі ў жніўні 2021, амаль праз год пасля затрымання, пасля чаго пакінуў Беларусь. Летам мінулага года стала вядома, што Віктар Куўшынаў сышоў з PandaDoc і стаў CEO міжнароднай кампаніі SE Ranking.

У 2021 годзе PandaDoc адкрыла офісы ва Украіне і Польшчы, а ў лютым 2022 года ліквідавала юрыдычную асобу ў Беларусі. Экс-дырэктар мінскай PandaDoc Дзмітрый Рабцэвіч яшчэ ўвосень 2020 стварыў новую кампанію «ПЦІ Салюшнс», якая займаецца распрацоўкай софту і з’яўляецца рэзідэнтам ПВТ. Інфармацыі пра дзейнасць кампаніі няма.

Беларускі стартап, які ў 2017 годзе стварылі Вячаслаў Мазай, Усевалад Генін і Саша Якаўлеў. Стварае праграмы і анлайн-платформу для маніторынгу стану пасяўных плошчаў, павелічэння ўраджайнасці і эканоміі рэсурсаў. Прадукты кампаніі будуюцца на алгарытмах машыннага навучання і аналізе касмічных здымкаў. У 2021 годзе алгарытмы OneSoil штодня аналізавалі 5+ млн палёў.

У 2021 годзе OneSoil прыцягнуў 5 млн долараў ад двух заходніх фондаў. Увосень таго ж года Слава Мазай, які займаў пасаду СЕО ад моманту заснавання OneSoil, перайшоў на пазіцыю дырэктара па інавацыях. Каманду ўзначаліў новы СЕО са Швейцарыі Мортэн Шміт.

Улетку 2022 года Мазай сышоў з кампаніі. Але яшчэ на пачатку 2022 года стала вядома, што OneSoil выйшаў з ПВТ і фактычна спыніў працу ў Беларусі. Ад сакавіка мінулага года беларуская юрыдычная асоба ТАА «Уансоіл» знаходзіцца ў стадыі ліквідацыі. Агратэх-стартап працягвае працаваць са Швейцарыі і Польшчы. Таксама кампанія спыніла ўсе камерцыйныя аперацыі ў Расіі. 

Кампанія заснаваная ў 2015 годзе Дзмітрыем і Юрыем Гурскімі.

Выпускае праграмы ў сегменце жаночага здароўя Flo. Апошнія тры гады праграма з’яўляецца найпапулярнейшай у App Store у катэгорыі Health&Fitness. Паводле даных кампаніі, у праграмы 250+ мільёнаў унікальных карыстальнікаў у свеце. 

Увосень 2021 года Flo закрыла інвестыцыйны раўнд B і стала амаль аднарогам (ацэнка кампаніі вырасла да $800 млн).

На пачатку 2022 года з’явілася інфармацыя аб сыходзе Flo з Беларусі. Пазней стала вядома пра ліквідацыю кампаніяй беларускай юрыдычнай асобы. Цяпер офіс распрацоўкі знаходзіцца ў Вільні. За 2022 года каманда літоўскага офіса вырасла ў 4 разы. Таксама кампанія мае прадстаўніцтва ў Нідэрландах і ЗША. Штаб-кватэра Flo — у Лондане. 

Кампанію заснаваў у 2004 годзе Міхаіл Дубакоў. Флагманскі прадукт — сістэма кіравання аджайл-праектамі для буйных кампаній. 

Увесну 2018 года Targetprocess прыцягнула 5 мільёнаў долараў ад інвестфонду «Зубр Капітал» і Еўрапейскага банка рэканструкцыі і развіцця. Пазней Міхаіл Дубакоў адышоў ад аперацыйнага кіравання Targetprocess і заняўся новым праектам — Fibery. 

У лютым 2021 года Targetprocess купіла амерыканская кампанія Apptio — глабальны пастаўшчык рашэнняў у галіне кіравання тэхналагічным бізнэсам.

У Targetprocess у Беларусі працавала каля 100 спецыялістаў. Але яшчэ вясной 2022 года каманда рэлакавалася з Беларусі ў Польшчу. Мінскі офіс ліквідуецца.

Платформа для менеджменту праектаў. Стартап у 2019 годзе заснаваў Міхаіл Дубакоў пасля сыходу з Targetprocess.

У маі 2021 года Дубакоў пераехаў з Мінска на Кіпр. У ліпені Fibery прыцягнула 3,1 млн долараў. Крыху пазней кампанія выйшла з ПВТ у сувязі з ліквідацыяй мінскага офіса. Як патлумачыў Дубакоў, большасць супрацоўнікаў кампаніі пакінула Беларусь, каманда перайшла на аддалены рэжым працы, неабходнасць у развіцці офіса ў Мінску адпала. Канчаткова кампанія была ліквідаваная ў жніўні 2022 года. 

Праект запусцілі ў 2017 годзе Юрый і Аляксей Мельнічкі. Стартап займаецца распрацоўкамі ў сферы AR-commerce. Галоўныя прадукты — праграмы для віртуальнай прымеркі касметыкі (Wanna Nails) і красовак (Wanna Kicks).

Увесну 2022 года кампанію купіў Брытанскі маркетплэйс Farfetch за 29,4 мільёна долараў. У мінскім офісе працавала 60+ чалавек, пасля ўгоды яны сталі супрацоўнікамі Farfetch. Сёння, мяркуючы з Linkedin, супрацоўнікаў у Мінску не засталося, яны працуюць з Літвы, Польшчы, Кіпра. Ад лета мінулага года кампанія ў Беларусі знаходзіцца ў стадыі ліквідацыі. 

AI-рэдактар, які ўмее распазнаваць аб’екты на відэа/фота і накладваць эфекты. Стартап заснаваны ў 2019 годзе Іллём Лесуном, Ганнай Буглаковай, Васілём Касніцкім, Сяргеем Малюціным. Гэта партфельны праект інвестыцыйнай кампаніі Bulba Ventures Юрыя Мельнічка і Андрэя Аўсіевіча.

За два гады ад моманту заснавання Vochi прыцягнуў каля 4 мільёнаў долараў. Сярод інвестараў — Angelsdeck, A. Partners, TA Ventures, Kolos VC, Startup Wise Guys, Flyer One Ventures, а таксама топ-менеджары беларускага Verv і эстонскага Bolt. 

Пры канцы 2021 года Vochi купіла амерыканская Pinterest. Сумы ўгоды бакі не раскрылі. Эксперты, апытаныя dev.by, казалі пра сумы ад 15 да 100 млн долараў. У чэрвені гэтага года Pinterest абвясціла пра адкрыццё офіса ў Варшаве. Ядром варшаўскага офіса планавалі зрабіць каманду Vochi. Мінскі офіс кампаніі ліквідуецца. 

Амерыканская кампанія, заснаваная Максам Янкелевічам (выпускнік Масачусецкага тэхналагічнага інстытута) і Андрэем Волкавым (выпускнік Маскоўскага фізіка-тэхнічнага інстытута) у 2010 годзе. Займаецца распрацоўкай тэхналогій для аўтаматызацыі бізнэс-працэсаў. У 2017 годзе партнёрам WorkFusion па падрыхтоўцы рашэнняў па аўтаматызацыі ў фінансавым, медыя- і трэвал-сегментах стаў EPAM.

Dealroom (еўрапейская сетка краўдсорсінгавых платформаў) ацаніла кошт WorkFusion ў 880-1,3 мільярда долараў. Аналітыкі інвестыцыйнага буціка ASER Capital ацанілі кампанію яшчэ вышэй — у 5,5 мільярда долараў.

У мінскім офісе (акрыўся ў 2012 годзе) працавала больш за 100 супрацоўнікаў. Ад восені 2022 года юрыдычная асоба ў Беларусі ліквідуецца. 

Уваходзіць у топ-5 найбуйнейшых паблішараў у свеце. Заснаваная ў 2004 у расійскай Волагдзе. Галаўны офіс размешчаны ў Дубліне. У студзені 2019 года 100% Playrix перайшлі да кіпрскай «Рым’ют Холдінгс Лімітэд». У верасні 2020 года кампанія ацэньвалася ў 7,8 мільярда долараў.

Кампанію ў Беларусі Playrix зарэгістравала ў снежні 2018 года. У 2019 годзе яна ўступіла ў ПВТ і інвеставала ў капітал беларускай студыі Vizor Games. У мінскім офісе на пачатку 2022 года працавала каля 100 чалавек.

Восенню 2022 года заснавальнікі заявілі, што Playrix сыдзе з Беларусі і Расіі, закрые ўсе офісы, а таксама спыніць аперацыйную дзейнасць у гэтых краінах.

Пазней кіпрская «Рым’ют Холдынгс Лімітэд», якая з’яўляецца ўласнікам Playrix, перадала беларускі актыў — «Плэйрыкс Бі Уай». Новым уласнікам кампаніі стаў грамадзянін Беларусі Уладзімір Акімаў. 

Сэрвіс для аптымізацыі даходаў ад мабільнай рэкламы, арыентаваны на распрацоўшчыкаў мабільных праграм. Праект у 2014 годзе запусціў расійскі бізнэсовец Павел Голубеў.

У 2018 годзе кампанія адкрыла офіс распрацоўкі ў Мінску. Тут працавала 50+ чалавек. Восенню 2020 года Павел Голубеў заявіў пра планы адкрыць офіс па-за межамі Беларусі і рэлакаваць супрацоўнікаў з Мінска.

Цяпер у кампаніі адкрытыя падраздзяленні ў трох лакацыях — у Осціне, Барселоне і Варшаве. Мінскі офіс ліквідуецца ад пачатку мінулага года. 

Амерыканская кампанія, заснаваная ў 2007 годзе. Адная з вядучых сусветных кампаній, якія ствараюць прадукты для аўтаматызацыі бізнэс-працэсаў страхавых кампаній. 

У ліпені 2021 года EIS прыцягнула больш за 100 мільёнаў долараў ад міжнароднага інвестфонду TPG. Кампанія заяўляла, што частка інвестыцый пойдзе на развіццё мінскага офіса — яго планавалі пашырыць на 30%. Але ў гэты момант мінскі офіс, у якім працавала каля 250 супрацоўнікаў, ліквідуецца. 

Адначасова летась EIS прыкладна на 30% павялічыла штат літоўскага офіса. Таксама літоўскае падраздзяленне EIS патрапіла ў топ-50 кампаній сектара «інфармацыя і сувязь» паводле выплачаных падаткаў — 1,7 мільёна еўра за тры кварталы. 

Самы папулярны беларускі паблішар і адзін з найбуйнейшых мабільных выдаўцоў (паводле колькасці спамповак) у свеце паводле даных App Annie (2021). Агульная колькасць спамповак гульняў — 3+ млрд. 

У беларускім офісе працуе 45 чалавек (даныя з профілю на dev.by). таксама ў кампаніі ёсць офісы ва Украіне і на Кіпры. У студзені мінулага года COO Say Games Дзяніс Вайханскі паведаміў dev.by, што кампанія была і застаецца ў Беларусі. Кампанія працягвае наймаць супрацоўнікаў, у тым ліку для працы ў РБ.

Беларуска-брытанскі мабільны распрацоўшчык і паблішар. У кампаніі працуе каля 300 супрацоўнікаў, чацвёра з іх — у мінскім офісе. Таксама частка каманды працуе ў Польшчы (пры канцы 2022 быў афіцыйна адкрыты офіс у Варшаве), Украіне, Партугаліі і Вялікабрытаніі.

Летась Gismart адкрыла некалькі карпаратыўных хабаў у Еўропе і абвясціла аб пераходзе на фармат працы Remote First. Таксама кампанія плануе пашырыць штат у Польшчы і іншых краінах Еўрасаюза. Планаў па развіцці мінскага офіса Gismart не агучвала.

Міжнародны распрацоўшчык і выдавец мабільных гульняў. Кампанія ўваходзіць у топ-5 самых папулярных паблішараў з беларускімі каранямі. 

Паводле інфармацыі супрацоўнікаў, у снежні 2021 — студзені 2022 у кампаніі працавала каля 700 чалавек. Улетку іх колькасць скарацілася да 350+. Штат беларускага офіса скараціўся са 120 (станам на кастрычнік 2021) да 40 чалавек.

Улетку мінулага года, паводле інфармацыі крыніц, Playgendary звольніла да 200 чалавек у розных лакацыях, у тым ліку ў Мінску. Некаторыя супрацоўнікі былі звольненыя пасля падпісання кантрактаў з офісам на Кіпры. Гучалі здагадкі, што мінскі офіс плануецца закрыць. Але пакуль няма афіцыйнай інфармацыі пра ліквідацыю юрыдычнай асобы ў Беларусі. 

Буйны распрацоўшчык мабільных гульняў, спецыялізуецца на галаваломках і лагічных гульнях. Ад 2021 года з’яўляецца «дачкой» шведскай Embracer Group, якая купіла кампанію з беларускімі каранямі за 640 мільёнаў долараў. 

У кампаніі працуе каля 300 чалавек. Колькі з іх у Беларусі — невядома. Пры канцы 2021 года ў беларускім офісе працавала каля 180 супрацоўнікаў. У профілі ў LinkedIn каля 130 супрацоўнікаў Easybrain пазначылі ў якасці асноўнай лакацыі Беларусь. Але на сайце кампаніі няма згадкі пра беларускі офіс. Ёсць толькі кантакты кіпрскага офіса. 

Студыя з’яўляецца стратэгічным партнёрам AppLovin — сусветнай мабільнай рэкламнай платформы. У 2019 годзе Belka Games прыцягнула стратэгічныя інвестыцыі ад AppLovin, якая на той момант ацэньвалася ў 2 мільярды долараў. Па выніках 2021 года Belka Games увайшла ў топ-3 паводле памеру атрыманай выручкі сярод паблішараў з беларускімі каранямі (2 месца).

Паводле інфармацыі крыніц, яшчэ ў 2021 годзе кампанія ўвяла мараторый на найманне ў РБ. Ахвотным пераехаць даюць магчымасць уладкавацца ў замежных падраздзяленнях. Кампанія мае офісы ва Украіне, Грузіі, Польшчы, Літве, Чарнагорыі і на Кіпры. У пераліку лакацый Беларусь адсутнічае.

Адзін з найбуйнейшых у свеце распрацоўшчыкаў мабільных гульняў са штаб-кватэрай у Ізраілі. 

У публічных справаздачах кампаніі ад другой паловы 2020 года Беларусь пастаянна фігуруе ў фактарах рызыкі (раз і два) праз нестабільную палітычную сітуацыю.

У офісе Playtika ў Мінску ў дакрызісныя гады працавалі 600 чалавек. У 2020 годзе кампанія зарэгістравала юрыдычную асобу ў Польшчы, куды паступова перавезла палову мінскага офіса (паводле звестак ізраільскага выдання Globes).

У сярэдзіне снежня 2022 года Playtika за адзін дзень скараціла офісы ў Мінску і Варшаве. Паводле даных заходніх СМІ, усяго было звольнена больш за 600 чалавек, або 15% штату. На афіцыйным сайце Playtika няма вакансіі для працы ў Беларусі. Але дагэтуль нават чутак пра магчымае закрыццё мінскага офіса кампаніі не было. 

Амерыканскі стартап, пастаўшчык карыстальніцкіх карт для вэб-сайтаў і праграм. Офісы і прадстаўніцтвы ў ЗША, ЕС, Японіі, Беларусі ды інш. Агульная колькасць супрацоўнікаў — больш за 500 чалавек.

У 2017 годзе Mapbox купіў беларускі стартап MapData, на базе якога ў Мінску быў створаны R&D цэнтр Mapbox. Мяркуючы з профілю на dev.by, у мінскім офісе працуе каля 190 супрацоўнікаў. 

Вясной 2021 года кампанія заяўляла, што збіраецца пашыраць сваю прысутнасць ва ўсім свеце, уключаючы R&D-цэнтр MapBox ў Мінску. 

Міжнародная кампанія, якая ўваходзіць у склад Rakuten Inc. з цэнтрамі распрацоўкі ў Беларусі, Ізраілі, Грузіі (офіс у Тбілісі адкрылі ў 2022). Глабальны штат — 500+ супрацоўнікаў, з іх у Беларусі каля 140.

У 2020 годзе кампанія часова закрывала офіс у Беларусі праз перабоі з сувяззю.

У лістападзе мінулага года стала вядома пра звальненні ў офісах Viber, у тым ліку ў Мінску. Прычыны — пагаршэнне фінансавых паказчыкаў і сітуацыя ў рэгіёне. Але інфармацыі пра магчымае закрыццё офіса няма.

Холдынг SK Hynix уваходзіць у топ-3 сусветных вытворцаў паўправаднікоў і спецыялізуецца на вытворчасці рашэнняў на аснове паўправадніковай памяці тыпу DRAM і NAND Flash, а таксама КМОП-сэнсараў.

Беларускае падраздзяленне SK Hynix было адкрытае ў 2014 годзе. Кампанія займаецца распрацоўкай убудаванага праграмнага забеспячэння і верыфікацыяй кантролераў цвёрдацельных назапашвальнікаў (SSD) і назапашвальнікаў мабільных прылад. Рашэнні выкарыстоўваюцца ў прадуктах сусветных кампаній і лідараў індустрыі. 

Да вайны ва Украіне ў мінскім офісе SK Hynix працавала больш за 200 чалавек. Ад лета мінулага года кампанія актыўна рэлакавала супрацоўнікаў у Гданьск для працы ў кампаніі Solidigm. Гэта даччыная структура SK Hynix, якая была створана ў выніку ўгоды з Intel. Паводле слоў супрацоўнікаў, сёлета мінскі офіс могуць закрыць.